Həbs edilmiş NİDA fəallarının valideynləri aclıq aksiyasına başlayırlar
NİDA hərəkatının həbs edilmiş fəallarının valideynləri prokurorun övladlarını uzunmüddətli həbs cəzalarına məhkum etmək istəyinə etiraz əlaməti olaraq aprelin 20-dən aclıq aksiyasına başlayırlar.
Bununla onlar aprelin 17-də istintaq təcridxanasında aclıq aksiyasına başlamış fəallarla həmrəylik nümayiş etdirirlər.
Cümə günü RATİ-də keçirilən mətbuat konfransı buna həsr olunmuşdu.
Təqsirləndirilən Zaur Qurbanlının anası Səkinə Qurbanova prokuror Nemət Əvəzovun hazırlıq üçün vaxt istəmədiyinə, dərhal yekun nitqlə çıxış etdiyinə diqqət çəkib. “Prokuror yarım il əvvəl prosesin başlanğıcında elan edilmiş ittiham aktını sözbəsöz təkrar edib. Belə çıxır ki, aylarca davam edən məhkəmə müdafiə tərəfin təqdim etdiyi arqumentləri diqqətə almayıb, vəkillərin təkziblərinin isə heç bir mənası olmayıb”, deyə Qurbanova bildirib.
Buna görə valideynlər aprelin 20-dən bütün məhbusların azad edilməsi tələbi ilə müddətsiz aclıq aksiyasına başlayırlar. Aksiya Müsavat Partiyasının qərargah mənzilində keçiriləcək.
Qurbanova təqsirləndirilənlər həqiqətən də ittiham olunduqları cinayətləri törətsələr belə, prokurorun təklif etdiyi hökmün sərt olduğuna diqqət çəkib.
Rəşadət Axundovun anası Mətanət Axundova gənclərin sadəcə əsgər ölümlərinə dinc etiraz etmələrinə baxmayaraq, onlara qarşı irəli sürülmüş ittihamların və onların “bandit” kimi təqdim edilməsinin əsassız olduğunu bildirib.
Şahin Novruzlunun atası İbrahim Novruzlu bildirib ki, cinayət işinin saxtalaşdırıldığı göz önündə idi. “Amma mən MTN-dən guya mənim Şahinin həbsindən sonrakı ilk günlərdə onun dindirilməsində iştirak etdiyim barədə sənədi oxuduqda heyrətləndim. Yəni bu, açıq-aşkar yalan idi”, deyə İ.Novruzlu bildirib.
Müsavat Partiyasının Məclis üzvü, keçmiş vicdan məhbusu Tural Abbaslının anası Başxanım Abbasova bidirib ki, o da NİDA fəallarının aclıq aksiyasına qoşulacaq. Onun fikrincə, hakimiyyət fəal gəncləri ona görə həbsə atır ki, onlardan qorxur.
ReAl hərəkatının idarə heyətinin üzvü Azər Qasımlı bildirib ki, hakimiyyət NİDA fəallarını ona görə təqib edir ki, onlar Azərbaycanı başqa cür – korrupsiyasız, xalqın sərvətləri mənimsənilməyən, təhsil sistemində problemlər olmayan ölkə kimi görmək istəyir.
Valideynlərin fikrincə, hakimiyyət demokratik düşərgədən olan gəncləri qorxutmaq və cəmiyyətə qorxu salmaq istəyir. “Əslində qorxu yoxdur. Qorxu biz qorxduğumuz zaman yaranır. Bunu dəf etmək lazımdır”, deyə Qasımlı qeyd edib.
O, repressiyalara müqavimət göstərmək üçün səyləri birləşdirməyi və Nida fəallarının və digər siyasi məhbusların müdafiəsi üçün etiraz aksiyasına hazırlıq üzrə təşkilat komitəsi yaratmağı təklif edib.
NİDA-nın idarə heyətinin üzvü Ülvi Həsənov öz növbəsində qeyd edib ki, müxtəlif formalarda, o cümlədən sosial şəbəkələrdə etiraz aksiyaları hazırlanır.
Bundan başqa, Amnesty İnternational İnternetdə NİDA fəallarının azad edilməsi tələbi ilə müraciətə imzatoplama kampaniyası keçirir. -06С-
Cəmiyyət
-
Daxili İşlər Nazirliyinin Kibertəhlükəsizliyə Qarşı Mübarizə Baş İdarəsinin əməkdaşlarının keçirdiyi əməliyyat nəticəsində Əhməd Məmmədov və Etibar Vəliyev saxlanılıb. Onlar vətəndaşların bank kartlarından pul oğurlamaqda şübhəli bilinirlər.
-
İyulun 17-də Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi, lakin günün birinci yarısında bəzi yerlərdə arabir yağış yağacağı gözlənilir. Mülayim şimal-qərb küləyi əsəcək.
-
Sosial şəbəkələrdə polis əməkdaşının vətəndaşın cibinə bir paket qoyduğuna, daha sonra şiddət tətbiq edərək onu saxladığına dair görüntülər yayılıb. Bu kadrların yayılmasından bir gün sonra DİN onlara münasibət bildirib.
-
Fövqəladə Hallar Nazirliyinin "112" qaynar telefon xəttinə Xızı rayonu, Yeni Yaşma qəsəbəsi ərazisində sursat aşkar edilməsi barədə məlumat daxil olub. Məlumatla əlaqədar dərhal FHN-in Xüsusi Riskli Xilasetmə Xidmətinin (XRXX) minalardan təmizləmə üzrə çevik qrupu hadisə yerinə cəlb edilib.
Rəy yaz