Həbsdə olan jurnalistə qarşı yeni ittiham irəli sürülüb

Həbsdə olan jurnalist Əfqan Sadıqova qarşı yeni ittiham irəli sürülüb.

Cəlilabad Rayon İcra Hakimiyyətinin başçısı Əziz Əzizov xüsusi ittiham qaydasında jurnalistin Cinayət Məcəlləsinin 147.2-ci (böhtan) maddəsilə məsuliyyətə cəlb olunmasını tələb edir. Bu barədə Turan-a vəkil Elçin Sadıqov bildirib.

Azel.tv saytının təsisçisi və redaktoru Ə.Sadıqov ötən il noyabrın 22-də saxlanılıb. Ona CM-in 127.2.3-cü maddəsi (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham irəli sürülüb. Yanvarın 12-də o 2,5 il müddətinə azadlıqdan məhrum edilib.

Jurnalist ittihamı rədd edərək bildirib ki, yerli hakimiyyəti tənqid etdiyinə görə ona qarşı təxribat törədilib.

Ə.Sadıqov yerli hüquq müdafiəçiləri tərəfindən siyasi məhbus kimi tanınıb.

Vəkil deyib ki, hələlik iddiaya hansı yazının səbəb olduğu məlum deyil.

Hazırlıq iclası martın 7-nə təyin edilmişdi, ancaq baş tutmayıb. Bu barədə ailə üzvlərinə və vəkilə martın 8-də məlumat verilib.

Vəkil  xüsusi ittiham qaydasında iddianın əsassız olduğunu bildirib.  Belə ki, Avropa İnsan Hüquqları Məhkəməsinin presedent qərarlarında diffamasiyaya görə cəzanın təyin edilməsinin qanunazidd olduğu göstərilir.—06В-