Həbsdə olan jurnalistin anasını BMT nümayəndəliyində qəbul etməyiblər

5 il mühakimə olunmuş  7gun.az portalının redaktoru Cavid Şirəliyevin anası Zahirə Şirəliyevanın oğlunun taleyilə bağlı BMT nümayəndəliyini məlumatlandırmaq üçün ikinci cəhdi də uğursuz olub.

“Bu gün nümayəndəlikdə mənə dedilər ki, onlar siyasi məsələlərlə məşğul olmurlar və məni qəbul etmədilər”, - Z.Şirəliyeva Turan agentliyinə bildirib.

Ana BMT nümayəndəliyində birinci görüşə ötən ilin sonlarında cəhd etmişdi. O zaman ABŞ və Avropa İttifaqı diplomatik nümayəndəliklərində görüşləri olmuşdu.

Bu gün Z.Şirəliyeva İsveç, Almaniya, Norveç və Fransa səfirliklərində görüş istəyib və onu qəbul edəcəklərini vəd ediblər.

Z.Şirəliyeva Gəncə Apellyasiya Məhkəməsinin dünənki qərarından sonra yenidən diplomatik korpusa müraciət etmək qərarına gəlib. Belə ki, sözügedən məhkəmə onun oğlunu həbsdə saxlayıb

Gəncə Apellyasiya Məhkəməsi çoxsaylı təxirəsalmalardan sonra, nəhayət, yanvarın 18-də 7gun.az  portalının redaktoru Cavid Şirəliyevin şikayətini təmin etməyib.

Xatırladaq ki, C.Şirəliyev 2016-cı il mayın 22-də 5 il müddətinə azadlıqdan məhrum edilib. Gəncə Şəhər Ağır Cinayətlər Məhkəməsi onu hədələmək yolu ilə rüşvət tələb etmə ittihamı ilə (CM-in 182.2.1 və 182.2.4-cü maddələri) təqsirli bilib.

Məhkəmə şikayəti təmin etməyib. Müdafiə tərəfi qərarla razı deyil və Ali Məhkəməyə kassasiya şikayəti vermək niyyətindədir

Sülh və Demokratiya İnstitutu, “Siyasi Məhbuslarsız Azərbaycan” Alyansı və Siyasi Məhbusların Monitorinqi Mərkəzi C.Şirəliyevi 160 nəfərlik siyasi məhbuslar siyahısına daxil ediblər.--0—