«Həbslər REAL-ı respublikaçılıq dəyərləri uğrunda mübarizdədn çəkindirməyəcək»-REAL-da mətbuat konfransı

Demokratlar məğlub olmur.  Natiq Cəfərlinin həbsi gücü artmaqda olan siyasi təşkilata qarşı siyasi təzyiqdir. Bu, bizi qorxutmur. REAL respublika dəyərləri, qanunun aliliyi, demokratiya və dünyəvilik uğrunda mübarizəsindən geri çəkilməyəcək. Bu gün REAL Hərəkatının icra katibi Natiq Cəfərlinin həbsi ilə bağlı bu qurumun qərargahında keçirilən mətbuat konfransındakı çıxışların əsas leytmotivi belə olub.

Mətbuat konfransında REAL Hərəkatının fəalları, Milli Şuranın sədri Cəmil Həsənli, D 18 Hərəkatının rəhbəri Ruslan İzzətli, ictimai xadimlər, QHT rəhbərləri iştirak ediblər.

 REAL-ın İdarə Heyətinin üzvü Erkin Qədirli bildirib ki, həbslər REAL-ı zəiflədə  builməz.

“REAL sədri İlqar Məmmədov artıq 4 ildir ki, həbsdədir. İdarə Heyətinin üzvü Rəsul Cəfərov bu yaxınlarda həbsdən buraxılıb. İndi isə  Natiq Cəfərli  həbs edilib.  REAL bu həbslər dövründə daha da möhkəmlənib, üzvlərinin sayı artıb. REAL referendumda Təşəbbüs Qrupu yaratmaq üçün imza toplayıb qediyyatdan keçib. İndi 45 minlik imza vərəqələrini alıb. Natiq Cəfərlinin həbsi insanların REAL-ın ətrafında daha sıx cəmləşməsinə  təkan verəcək”, - o qeyd edib.

E.Qədirli deyib onu qanuna zidd olaraq gecə vaxtı saxlayıblar, sonra qanunsuz olaraq prokurorluqda dindiriblər. Evində gecə saatlarında qanunsuz olaraq axtarış aparıblar. Kompüterini və  həyat yoldaşının zinət əşyalarını  götürüblər. Nəsimi Rayon Məhkəməsi də gecə saatlarında qanunsuz olaraq Cəfərlinin həbsi ilə bağlı  qərar çıxarıb.

REAL İdarə Heyətinin üzvü Altay Göyüşov deyib ki, həbslərlə REAL-ı zəiflətmək mümkün deyil “Biz bilirik ki, qarşımızdakı rejim zorludur. Hətta bilirik ki, yaxın və  orta perspektivdə qələbə də olmaya bilər. Amma  tarixi  bir misal da var - Cavad xan Gəncəni rus ordusundan müdafiə edəndə ideyalarının qalib gələcəyinə inanırdı. Biz İbrahimxəlil xan (19-cu əsrin əvvəlində Qarabağ xanı olub-red.) olmaq istəmirik, yolumuz Cavad xan yoludur”, - tarix elmləri doktoru Göyüşov qeyd edib. 

REAL Hərəkatı Natiq Cəfərlinin həbsi ilə bağlı bəyanat da yayıb.

“Natiq Cəfərlinin həbsi bu ölkədə bir neçə ildir davam edən siyasi repressiyaların dayanmadığını əyani şəkildə sübut edir. Bu nöqteyi-nəzərdən onun həbsi demokratiya və insan haqlarını  özünün maraq və  prioriteti sayan ABŞ və Avropa Birliyi ölkələrinin dəyərlərə həqiqətən də sadiqliyi məsələsini imtahan qarşısında qoyur. Yaranmış şəraitdə onlar bəyan etdikləri dəyərlərə həqiqətən də sadiq olduqlarını yalnız insan haqlarını pozanlara, demokratiyanı boğanlara sanksiyalar tətbiq etməklə sübut edə bilər”, - sənəddə qeyd olunur.

REAL bəyan edir ki, N.Cəfərliyə  qarşı irəli sürülmüş ittihamlar tamamilə əsassızdır və siyasi motivlidir.

“O, dərhal və qeyd-şərtsiz azadlığa buraxılmalıdır”,- sənəddə qeyd edilir. -03B-