Həbsxanalardakı vəziyyət hüquq müdafiəçilərində narahatlıq doğurur

Bu gün Media Mərkəzində ictimai fəalların toplantısı cəzaçəkmə müəssisələrində ağır vəziyyətə və orada hökm sürən özbaşınalığa həsr olunub. 17 saylı cəzaçəkmə  müəssisəsində cəza çəkən Nemət Pənahlının ictimaiyyətə müraciətindən sonra bu mövzu daha da aktuallaşıb.

İclasın təşəbbüsçüləri İnsan Haqları Klubui, Hüquq və Azadlıqların Müdafiəsi İnstitutu, “Siyasi Məhbuslarsız Azərbaycan” İctimai Alyansı. Vəkil Elçin Namazovun  sözlərinə görə, həbsxanada intiharların və səbəbsiz ölümlərin sayının artması əsaslı narahatlıq doğurur. Dekabrın 16-da 17 saylı koloniyada Pərviz Mikayılovun intihar etməsi faktı üzrə cinayət işinin qaldırılması  tələbilə prokurorluğa müraciət göndərilib.

Vəkil Qobustan həbsxanasındakı durumu da çox mürəkkəb adlandırıb. Müxtəlif mənbələrdən ölkənin ən ciddi həbsxanasında amansız işgəncələr və ölümlər barədə informasiyalar daxil olur. 

Penitensiar Xidmətin xəstəxanasında da məhbuslar ölür. Bu cür hallar Murad Şükürov və digərləri ilə baş verib. “Şükürovu orada müalicə etmək mümkün olmayıb, üç ay ərzində o ölüb. Bu cür hallar təkcə siyasi məhbuslara qarşı baş vermir. İctimaiyyət siyasi məhbuslarla baş verənlərdən daha tez xəbər tutur, nəinki adi dustaqlara qarşı.

Hüquq müdafiəçisi Oqtay Gülalıyev da həmrəylik göstərərək özbaşınalığa qarşı birləşməyə çağırıb.

“Əgər Penitensiar Xidmətdə kimsə ölürsə buna görə dövlət məsuliyyət daşıyır”, - hüquqşünas Ənnağı Hacıbəyli bildirib. O hesab edir ki, bu faktlar üzrə beynəlxalq qurumlara və Avropa məhkəməsinə müraciətləri canlandırmaq lazımdır.

Vəkil Əsabəli Mustafayev bildirib ki, ömürlük həbsə məhkum edilmiş beş nəfərin maraqlarını müdafiə edir. Onların ciddi müalicəyə ehtiyacı var, lakin bundan məhrumdurlar. 

Vəkil Qurban Məmmədov N.Pənahlıya və hüquqları müntəzəm pozulan digər məhbusların dəstəklənməsini vacib hesab edib.

“Rejim sonunun yaxınlaşdığını başa düşür və odur ki, belə özbaşınalıq edir”, - Q.Məmmədov vurğulayıb. 

“Həbsxanada işgəncə dövlətin siyasətidir, ayrı-ayrı məmurların özbaşınalığı deyil”, - AXCP lideri Əli Kərimli qeyd edib. “Biz bu halların adi statistikaya çevrilməsinə yol verməməliyik”, - o vurğulayıb.

İnsanların sındırılması konveyeri hər yerdə işləyir: orduda, həbsxanalarda, siyasətdə. “Hakimiyyətə ləyaqətli, qürurlu insanlar lazım deyil. Bütün bunlara görə İlham Əliyev məsuliyyət daşıyır”, - o bildirib. 

Məhbusların hüquqlarının pozulması hallarını araşdıran daimi koalisiya olmalıdır. Həmçinin cəlladların, məhbuslara işgəncə verən adamların siyahısı hazırlanaraq müvafiq qurumlara verilməlidir.

İclasda dekabrın 16-da 17 saylı koloniyada ölən Pərviz Mikayılovun anası da iştirak edib. “Mənim oğlum işgəncələrə məruz qalıb və öldürülüb. O intihar etməyib”, - o qeyd edib.

O, polisə müqavimət göstərmək ittihamı ilə 3 il 16 saylı koloniyada  saxlanılıb. “Dekabrın 9-da bacısına zəng edib və özünü pis hiss etdiyini bildirib. Biz sonradan bildik ki, möhkəm döyülüb. Dekabrın  13-də həyat yoldaşı Mirvari həbsxana müalicəxanasında onunla görüşüb”, - ana bildirib.  

Vəkil İradə Cavadova bildirib ki, dekabrın 15-də Pərviz  müalicəxanadan 16 saylı koloniyaya aparılıb. Lakin bu koloniyada onu qəbul etməyərək bildiriblər ki, müalicəxanaya onu normal vəziyyətdə göndəriblər. Odur ki, 17 saylı koloniyaya aparıblar və ertəsi gün orada ölüb. 

Tədbirin yekunlarına əsasən iştirakçılar cəzaçəkmə  müəssisələrində yaranmış durumla baqlı müraciət qəbul ediblər. Müraciətdə penitensiar sistemində baş verən  özbaşınalıqların araşdırılması, həmçinin cəzaçəkmə yerlərində monitorinqlərin aparılması üçün şəraitin yaradılması tələb olunur.-04S-