Heç kəs 700 bala qədər yuksələ bilmədi

Bakı/11.08.21/Turan: İyulun axırında Dövlət İmtahan Mərkəzi II və III qrup üzrə qəbul imtahanlarında iştirak edən abituriyentlərin nəticələrini açıqlayıb.  

Hər iki mərhələ üzrə heç bir qrupda 700 bal toplayan abituriyent olmayıb.

Bu il II qrup üzrə ən yüksək nəticə 691.2 bal, III ixtisas qrupu üzrə isə 680 bal olub.

Eyni hal 2019-cu ildə də yaşanıb.

Bəzi mütəxəssislərin fikrincə isə bu, son illər ərzində ən pis nəticələrdir. Bunun səbəbi nədir?

Təhsil Nazirliyi yanında İctimai Şuranın sədr müavini İlqar Orucov Turana bildirib ki, keçən ilin martından təhsilin distant formada təşkili abituriyentlərin hazırlığına, təhsilin keyfiyyətinə xeyli dərəcədə mənfi təsir göstərdi. «Biz artıq ikinci ildir ki, analoji vəziyyətlə qarşılaşırıq».

Onun sözlərinə görə, Təhsil Nazirliyi Dövlət İmtahan Mərkəzi ilə birlikdə buraxılış imtahanlarından sualların pandemiyadan əvvəlki illərə nisbətən daha asanlaşdırılması üçün yollar axtardı. «Keçən il olduğu kimi, bu il də imtahanlarda həmin təcrübə tətbiq olundu və suallar daha asanlaşdırıldı».

O, qeyd edib ki, Təhsil Nazirliyi pandemiya şəraitində bütün mümkün imkanlardan istifadə etdi.

«Biz hər zaman orta məktəblərdə xüsusilə abituriyentlər üçün təhsil şəraitini yaxşılaşdırmaq məsələsini diqqətdə saxlayırıq. Ölkədə pandemiya ilə bağlı qəbul olunan qərarları daha çevik və doğru qərarlar kimi xarakterizə edərdim. Çətin şəraitdə, kritik vəziyyətdə əksər ölkələrdə yaranan təhsilsizlik boşluğu bizdə yaşanmadı. Təhsil Nazirliyi bütün mümkün vasitələrdən,

qeyri-ənənəvi təhsil alətlərindən istifadə edərək, bütün zəruri addımları atdı».

İ.Orucov vurğulayıb ki, əvvəlki təhsil ilindən fərqli olaraq, 2020-2021-ci ildə daha oturuşmuş təhsil mühiti yaradıldı. «Təqdim edilən vasitə və alətlərdən həm müəllimlər, həm də şagirdlər daha uğurla yararlana bildilər. Yeniliklər atılan addımlarla yekunlaşmamalıdır və yekunlaşmayacaq. Düşünürəm və ümid edirəm ki, növbəti təqvim və tədris ilində biz ənənəvi təhsilə başlaya biləcəyik».

Təhsil məsələlər üzrə ekspert Kamran Əsədov isə bildirib ki, abituriyentlərin maksimal balın toplaya bilməməsinə üç vacib amil təsir göstərdi. «2020-ci ilin mart ayından pandemiya səbəbindən dərslər ənənəvi qaydada keçirilmirdi. Xüsusi olaraq imtahan verən 11-ci siniflərin şagirdləri artıq ikinci ildir məktəbə getmirlər və onlayn qaydada dərslərdə iştirak edirlər. Hazırda ölkədə 4440 məktəblərdə təhsil alan 1,6 milyon şagirdin heç də hamısının kompüteri, smartfonu və yaxud da internetə çıxışı yoxdur».

Mütəxəssis qeyd edib ki, bu alətlər varsa belə onlayn qaydada bütün fənnlərinin keyfiyyətli tədrisi mümkün deyil. «Məsələn biologiya, riyaziyyat, kimya kimi fənnlərinin keyfiyyətli tədrisi onlayn qaydada mümkün deyil. Onlar individual sinifdə iş tələb edir. Riyaziyyat isə bütün ixtisas qruplarında var və onu zəyif bilməsi maksimum bal toplamağa mane olur».

Ekspertin fikrincə, 2021-ci ilin sentyabrın 27-dən başlayan və zəfərlə başa çatan Vətən müharibəsi var idi. «Həmin vaxt internetə məhdudiyyətlər qoyuldu və uşaqlar həm məktəbdən məhrum idilər, həm də onlayn dərslərdən məhrum olmuşdular. Digər tərəfdən Gəncə, Tərtər, Bərdə kimi ərazilərimiz Ermənistanın raket hücumuna məruz qalmışdı. Həmçinin bizim 2900 nəfərə qədər şəhidimiz var. Bu isə onların abituriyent qohumlarına psixoloji olaraq mənfi təsir göstərmişdi».

Əsədovun sözlərinə görə, üçüncü vacib məqam ondan ibarətdir ki, Dövlət İmtahan Mərkəzi hər il sınaq imtahanları keçirirdi. «Orada iştirak edən şagirdlər bildiyi və bilmədiyi mövzuları müəyyənləşdirə bilirdilər, sual kitabçası və cavab kart üzərində işləmək bacarığına malik idilər. İndi isə bunlar hər hansı sınaq imtahanlarında iştirak etmədən qəbul imtahanına getdilər. Bu da öz təsirini göstərdi».—0--