Həcc ziyarətinə getmək istəyənlərin sayı azalıb

Qafqaz Müsəlmanları İdarəsinin (QMİ) Həcc ziyarətinə zəvvarlardan sənəd qəbulunu avqustun sonuna kimi uzatması doğrudur. Bu haqda Turan-a məlumatlı mənbələr bildiriblər.

Mənbə onu da bildirib ki, sənəd qəbulu ilə vaxtın uzadılması ikinci dəfədir, öncə bu vaxt iyulun 31-nə kimi uzadılmışdı. Onların açıqlamasına görə, təqribən 150-yə qədər zəvvar yeri boş qalır.

Belə durumun  yaranmasına səbəb kimi mənbələr iki cəhəti göstərirlər. Bunlardan biri qiymətlərin bahalaşması, digəri isə zəyarət xərclərilə bağlı ödənişin manatla yox, dollarla aparılmasıdır. Bu ilin fevralında manatın devalvasiyasından sonra ödəniş dollarla aparılır.

Onu da deyək ki, keçən ilə qədər Azərbaycanda Həcc ziyarətilə bağlı fevral ayında başlanan sənədə qəbulu mayda yekunlaşırdı. Keçən il ziyarət xərcləri xidmət səviyyəsindən asılı olaraq 3250 və 4150 manat təşkil edirdi.

Bu il sənəd qəbulu martın 11-dən başlayıb. Zəvvarlar bu il Həcc ziyarətinə sentyabrın 11-dən yola düşəcəklər. Yaxın Şərq ölkələrində baş verən hadisələrlə bağlı Həcc ziyarətinə avtobuslarla gediş ləğv edilib, yalnız təyyarələrlə gediləcək. Bu il uçuşları AZAL-ın yerinə yetirməsi nəzərdə tutulur. Bu il isə xidmət səviyyəsindən asılı olaraq qiymətlər 4700 və 5750 dollar təşkil edir.     

Zəvvarlardan sənəd qəbulu üçün pasport, şəxsiyyət vəsiqəsinin surəti, 3x4 sm. ölçüdə 4 ədəd fotoşəkil və sağlamlıq haqqında arayış tələb olunur. Sənədlərin qəbulu yalnız QMİ-də aparılır.-05B-