Hilal Məmmədov tibbi müayinədən imtina edib

İyulun 12-də həbsdə olan hüquq müdafiəçisi və “Tolışi Sədo” qəzetinin redaktoru Hilal Məmmədovu qanında və sidiyində narkotik maddələrin olub-olmamasını aşkarlamaq üçün Respublika Narkoloji Dispanserinə ekspertizaya göndəriblər. Bu barədə Sülh və Demokratiya İnstitutu məlumat yayıb.

    Astma xəstəsi olan Hilal Məmmədovu iyirmi narkoman və vərəm xəstəsi ilə eyni maşında sıx şəraitdə göndəriblər ki, bu da öz-özlüyündə işgəncədir.

    Məlumatda bildirilir ki, Hilal Məmmədov müayinədən qəti imtina edib.

    “Bu təhlillərin aparılmasından imtinam bu proseduru şəxsiyyətimin məhvinə, səhhətimin pisləşməsinə yönəlmiş cinayət addımı, həyatıma qəsd kimi qiymətləndirirəm”, deyə SDİ Məmmədovdan sitat gətirir.

    Mənbənin məlumatına görə, Hilal Məmmədovun narahatlığı özünü doğruldub. Novruzəli Məmmədovun hüquqlarını müdafiə komitəsinin keçmiş sədri olaraq o, N.Məmmədovun həbsxana xəstəxanasında ölüm şəraiti barədə məlumatlıdır. 

    Bununla əlaqədar olaraq, SDİ beynəlxalq hüquq müdafiə təşkilatlarına, Avropa Parlamentinin deputatlarına hüquq müdafiəçisi Hilal Məmmədovun həbsdə qətlinə mane olmaq çağırışı ilə müraciət edib.

    Xatırladaq ki, Hilal Məmmədov saxta narkotik saxlamaq ittihamı ilə həbs edilib, sonradan İranın lehinə casusluqda ittiham edilib. Onun həbsinin əsl səbəbi ictimai fəaliyyəti və xüsusən Youtube-da “Putin, hələlik!” adlı videoçarx yerləşdirməsi olub. Sonradan müxalifət Rusiya və Azərbaycanda hakimiyyətin istefası tələbləri ilə bu videoçarxdan istifadə edib. -0-