Hökmdən Bakı Apellyasiya Məhkəməsinə şikayət verilib

Jurnalist Xədicə İsmayılovanın vəkilləri sentyabrın 1-də onun barəsində çıxarılmış hökmdən apellyasiya şikayəti veriblər. Bu barədə Turan-a vəkil Fariz Namazlı bildirib.

Şikayətlə birlikdə, müdafiə tərəfin şahidlərin ifadələri təhrif edilmiş məhkəmə protokolları üzrə iradları da təqdim edilib. Xüsusən, bir sıra protokollarda şahidlərin məhkəmədə dedikləri deyil, ibtidai istintaqda dedikləri yazılıb.

Hətta Xədicə İsmayılovanın öz sözləri də təhrif olunub və onun siyasi məhbuslar və işin siyasi xarakterli olması haqqında ifadələri qeyd edilməyib.

Müdafiə tərəfi tam təkrar məhkəmə istintaqı keçirilməsində israr edəcək, çünki birinci instansiya məhkəməsində demək olar ki, bütün vəsatətlər rədd edilib və hökmdə şahidlərin ifadələri nəzərə alınmayıb, onların bəziləri isə prosesə çağırılmayıb.

Şikayətə oktyabrın ortalarında baxılacaq.

Bundan başqa, sentyabrın 29-da Bakı Apellyasiya Məhkəməsində İsmayılovanın keçmiş müxalifətçi Elmar Türkoğlunun böhtan haqqında iddiası ilə bağlı hökmdən şikayəti üzrə proses təyin edilib. Bu hökmə görə jurnalist cərimə olunub.

* Sentyabrın 1-də Bakı Ağır Cinayətlər Məhkəməsi məşhur araşdırmaçı-jurnalist Xədicə İsmayılovanı 7,5 il müddətinə azadlıqdan məhrum edib. Məhkəmə onu 179 (mənimsəmə və israf), 192 (qanunsuz sahibkarlıq), 213 (vergi ödənişindən yayınma) və 308-ci (vəzifə səlahiyyətlərindən sui-istifadə) maddələrlə təqsirli bilib. Eyni zamanda, 125-ci (özünü öldürmə həddinə çatdırma) maddəsi ilə İsmayılovaya bəraət verilib. Prokuror məhkəmədən İsmayılovanın 9 il müddətinə azadlıqdan məhrum edilməsini istəyib. Yerli və beynəlxalq hüquq müdafiə təşkilatları İsmayılovaya qarşı cinayət ittihamlarının uydurma və onun hakimiyyətin yüksək eşelonlarında korrupsiya faktları üzrə jurnalist araşdırmaları ilə bağlı olduğuna inanırlar. -06D-