Mətbuat-monitorinq 19.09.15

Rəsmi qəzetlər dövlət başçısı İlham Əliyevin IV İslam Həmrəyliyi Oyunlarının 2017-ci ildə Bakı şəhərində keçirilməsi üzrə Təşkilat Komitəsinin yaradılması, neft sənayesi işçilərinin bir qrupunun təltif olunması, fəxri adlar, fərdi təqaüdlər verilməsi, Kürdəmirdə çoxmənzilli binaların əsaslı təmiri üçün 3 milyon manat, Ağsuda Mərkəzi Xəstəxananın əsaslı tərmiri üçün 10 milyon manat vəasait ayrılması haqda sərəncamların mətnlərini ilk səhifələrdə yerləşdiriblər.

“Azadlıq” qəzeti “Azərdəmiryol”un Nəqliyyat Nazirliyi tərkibindən çıxarılmasını “İlham Əliyevin Ziya Məmmədovla üzləşməsi” kimi ilk səhifəyə çıxarıb.

İqtidarın Avropada “insan haqları”nın pozulması halları tapdığı halda İsmayıllıda 12 yaşlı məktəblinin intiharına “niyə susursunuz?” sualı ünvanlayır.

Avroparlamentin həmprezidenti Heidi Hauta görə, qurumun Azərbaycanla bağlı tənqidi qətnaməsi ölkədə insan haqlarının çox pis olmasının nəticəsidir, beynəlxalq öhdəliklər yerinə yetirilmədiyi halda strateji əməkdaşlıq mümkünsüz olacaq.

Səhiyyə nazirinin müavini Elsevər Ağayevin dərmanların yeni qiymətlərlə satışında problem olması şərhini qəzet dərman qiymətlərinin tənzimlənməsinə aid rəsmi Bakının qərarını “boykot” adlandırır.

Cənubi Koreyaya aid “Eximbank”dan götürülən 150 milyon dollar kreditə tikilməsi gözlənilən karbamid zavodu tikintisinin “neftin qiymətinin ucuzlaşması” bəhanəsilə saxlanmasını qəzet “hakimiyyətin “karbamid oyunu” adlandırır.   

Dövlət başçısı İlham Əliyevin dövlət borclarının bir günə bağlana bilməsi bəyanatını ekspertlər ölkənin məhdud ehtiyatlarının tükəndirilməsi və populizm kimi şərh ediblər.

Vergilər Nazirliyinin borclu vergi ödəyicilərinin istintaqa cəlb olunması bəyanatını ekspertlər “səmərəli olmayan metod” sayıblar.

Maliyyə sektorunda ixtisarlar davam edir və qəzet “Unibank”ın artıq 32 işçini ixtisara saldığını yazır.

“Ekspress” qəzeti Azərbaycan XİN başçısı Elmar Məmmədyarovun Bakıda səfərdə olan Pentaqon təmsilçisi Evelin Farkaşa ABŞ-da bəzi dairələrin anti-Azərbaycan fəaliyyətindən şikayətini diqqət mərkəzinə çəkib.  

“Novoe Vremya” qəzeti “Müxalifət: Qərb bizə kömək edər” adlı məqaləsində ölkə müxalifətini təhqirə məruz qoyub.

“Bizim yol” qəzeti dəmir yollarının Nəqliyyat Nazirliyinin tərkibindən çıxarılmasını ilk səhifəyə yerləşdirib.

Deputat Qüdrət Həsənquliyev Sabunçu rayon icra başçısı Adil Vəliyevə “mağaza müdiri səviyyəsində olan adamın icra başçısı təyin edilməsi” rişxəndi ünvanlayıb.  

“Yeni Müsavat ” qəzeti dəmir yollarının Ziya Məmmədovdan alınmasını iqtidarın nəqliyyat nazirini “hissə-hissə bitirməsi” sayaraq ilk plana çəkib.

Ölkə banklarının böhranda olduğunu iddia edən qəzetə görə, ilin sonuna kimi ölkədə 20-yə yaxın bankın bağlanacağı gözlənilir.

“AĞ bloku”nun namizədləri Kərim Ağarza və Elşən Həsənov sənədlərini 60 və 67 saylı seçki dairələrinə təqdim etsələr də, onlara imza vərəqələri verilmir. 

Beynəlxalq qurumların rəsmi Bakıya siyasi məhbusları azadlığa baraxmaq bəyanatlarını yerli hüquq müdafiəçiləri “azadlığı ləngitmə amili” sayırlar.