Hökumət tərəfindən bağlanan mənzil renovasiyası üzrə "Pilot layihə" bakılıların mülkiyyətini dağıtmaqda davam edir

Bakı/23.01.21/Turan: 16 may 2018-ci ildə “Fedek” MMC tikinti şirkəti sahiblərin evdə olmamasından istifadə edərək, istefada olan hərbi qulluqçu Həmid Əfəndiyevin qarajını və oradakı əmlakını dağıdıb. O, zirzəmisi olan dördotaqlı mənzilini çoxmərtəbəli bina tikmək üçün bütün binanı dağıtmaq niyyətində olan bu şirkətə verməkdən imtina edib. Daha sonra binadakı qonşu mənzillər və çardaq və H.Əfəndiyevin birinci mərtəbədəki mənzilinin üstündəki bütün arakəsmələr dağıdılıb. İnşaatçılar Əfəndiyevə məxsus 14 bədii əsəri oğurlayıblar. O, rəsmlərdən birini “Fedek”in ofisində görüb və polisin səyləri ilə geri qaytarıb.

16 (03) 2020-ci il tarixində Bakı Apellyasiya Məhkəməsi iddiaçı Həmid Əfəndiyevin “Fedek” tikinti şirkətinə qarşı şikayətinə baxıb və birinci instansiya məhkəməsinin qərarını qüvvədə saxlayıb. Bu qərara görə, şirkət 37,5 min manat (iddiaçı 80 min manat tələb edib) maddi zərəri ödəməlidir. 10 ay keçib, amma şirkət məhkəmə qərarını yerinə yetirmir.

Birinci abzasda açıqlanan məlumatlar H.Əfəndiyevin məhkəməyə müraciətində əksini tapıb.

Onun Nəsimi Rayon Məhkəməsinə çoxsaylı müraciətlərinə cavab olaraq deyirlər ki, Apellyasiya Məhkəməsinin qərarı itib, qərarın icrasına cavabdeh məlum deyil.

Nəsimi Rayon məhkəməsinin 3 noyabr 2018- ci il tarixli 2 (006)- 4635/2018 saylı ayrıca qərarına baxmayaraq, “Fedek” binanı dağıtmaqda davam edib. Məhkəmə “Fedek” və ya digər təşkilatın binanı dağıtmasını və orada yaşamaq üçün maneələr törətməsini qadağan edib. Bununla da bu evin qəzalı olması barədə iddiaların yalan olduğu bir daha təsdiqlənib.

Bakı Şəhər İcra Hakimiyyətinə məktuba cavab olaraq 24 sentyabr 2020-ci il tarixli məktubda Əfəndiyevə bildirilib ki, onun şikayəti Nəsimi Rayon İcra Hakimiyyətinin başçısına göndərilib. Amma bu yazışmadan da  fayda yoxdur.

Cəzasız qalan “Fedek” 15 dekabr 2020-ci il tarixində Əfəndiyevlərin mənzilinin damını dağıdıb. Onlar Nəsimi Rayon Məhkəməsinə və FHN-ə müraciət ediblər, oradan deyiblər ki, bu işə məhkəmə instansiyalarında baxıldığından FHN müdaxilə edə bilməz.

Əfəndiyevlər Bakı şəhəri, Azadlıq prospekti, ev 80, mənzil 10 ünvanındakı dağılmış evdə yaşaya bilmir. Səbəb həyatları üçün təhlükənin olması və dam örtüyünün olmamadır.  Onlar oteldə qalır.

25 dekabr 2020-ci ildə tikinti şirkətinin sahibi Nicat sakinlərə açıq şəkildə bildirib ki, onlar mənzilləri “Fedek”in mülkiyyətinə verməsələr mənzillərə girə bilməyəcəklər.

Əfəndiyevlər ailəsi ilə söhbət zamanı Turan-a məlum olub  ki, öncə, bu şirkət onların həyətində olduğu vaxtlar orada məsul şəxs başqası olub - Yavər Qurbanov. Hazırda tikinti prosesində aşkar edilmiş dələduzluq səbəbindən o qədər də uzaq olmayan yerlərdə yerləşir.

"Eyfel" binasının tikintisinə rəhbərlik etmiş və orada eyni mənzili bir neçə adama satmış kriminal keçmişi olan həmin şəxsin bizim evin yerləşdiyi torpaq sahəsini İH-dən necə aldığı aydın deyil.

Yavər Qurbanovun həbsindən sonra tikinti tamamilə dayandırılıb, lakin təəssüf ki, onlar bizim mənzili qəsdən tamamilə dağıdıblar. Yavərın həbsindən sonra onun yerinə Nicat gəlib, lakin onun şəxsiyyəti və hüquqları barədə heç bir sənəd görməmişik", - dağılmış mənzilin sahibinin qızı Gülarə Əfəndiyeva bildirib.

Ailə redaksiyaya “Fedek”in nizamnamə kapitalının (hətta MTK deyil) 100 manat olduğunu göstərən sənəd təqdim edib.

Əfəndiyevlər ailəsi prezidentdən başlayaraq ölkənin birinci məmurlarına öz hüquqlarını xatırlatmaqla müraciət edir. Ailə hesab edir ki, Konstitusiyanın 13, 29, 31, 33 və 43-cü maddələri (mülkiyyət, yaşamaq hüququ)  İnsan Hüquqları və Əsas Azadlıqlar haqqında  Konvensiyanın birinci protokolu kobudcasına pozulur.

Redaksiya “Fedek” şirkətinin sahibi Nicat Sadıqovla söhbət edib. O deyib ki, Əfəndiyevlər 85  kv.m. mənzilə görə 690 min manat tələb edirlər. Şirkət onlara 350 min manat verməyə və ya Bakının istənilən rayonunda eyni  sahəsi olan başqa mənzil almağa hazırdır.  Lakin sakinlər qəzalı mənzilə görə onun bazar qiymətindən artıq ödəniş tələb edirlər.

"Yanvarın 27-də Apellyasiya Məhkəməsinin növbəti iclası keçiriləcək və Əfəndiyevlərin iddiasına yenidən baxılacaq.  Mən dövlətin istənilən qərarını yerinə yetirəcəyəm", - “Fedek”in sahibi Nicat Sadıqov Turan-a bildirib. –0—