Hökumət üzvləri Milli Qəhrəmanın dəfn mərasiminə gəlməyiblər

Müdafiə Nazirliyinin Təlim Mərkəzində cümə günü Azərbaycan Milli Qəhrəmanı Eldar Ağayevin dəfn mərasimi təşkil edilib. 

Milli Qəhrəmana hərbi ehtiram göstərilib. Onun dövlət bayarğına bükülmüş nəşi avtomobil eskortunun müşaiyətilə Təlim Mərkəzinin klubuna gətirilib, postament üzərinə qoyulub. Milli Qəhrəmanın cənazəsi ətrafında fəxri hərbi qarovul dayanıb. 

Müdafiə Nazirliyinin yüksək rütbəli əməkdaşları qəhrəmanın ailə üzvlərinə başsağlığı veriblər. 

Müdafiə Nazirliyinin polkovniki Abdulla Qurbani E.Ağayevin sovet ordusu sıralarında Əfqanıstanda, Almaniyada keçdiyi hərbi xidmətindən danışıb. Ermənistanın Azərbaycana təcavüzü ilə bağlı vətənə dönməsinə, döyüşlərə qatılmasına, bu döyüşlərdə göstərdikləri şücaətlərə toxunub. Dövlətçiliyin müdasfiəsində göstərdiyi xidmətlərə görə E.Ağayevin ən yüksək ad olan Milli Qəhrəman adına layiq görüldüyünü deyib. Bununla yanaşı, Bayraq ordeni və s. dövlət mükafatları ilə təltif olunub.    

Saat 15:00-da E.Ağayevin nəşi dəfn üçün qaldırılıb. Hərbi məktəblərin kursantları Miilli Qəhrəmanın cənazəsi önünüdə fotosunu, layiq görüldüyü mükafatları daşıyıblar. Dəfn zamanı üç dəfə yaylım atəşi açılıb.

Milli Qəhrəman E.Ağayev II Fəxri Xiyabanda, hərbiçilərin dəfn olunduqları hissədə torpağa tapşırılıb. E.Ağayev torpağa veriləndən sonra cənazəsi bükülmüş dövlət bayrağını müdafiə naziri Səfər Əbiyev qəhrəmanın oğlu Toğrul Ağayevə təhvil verib.   

E.Ağayev 1955-ci ildə anadan olub, gənc yaşlarından hərbi sənətə maraq göstərib, sovet ordusu tərkibində Əfqanıstanda döyüşüb. daha sonra xidmətini sovet qoşunlarının Almaniyadakı birləşmələrində davam etdirib. Ermənistanın Azərbaycana müharibəyə başlaması ilə bağlı vətənə dönərək hərbi xidmətini Milli Ordu sıralarında davam etdirib. 

E.Ağayev 2013-cü il mayın 17-si gecə ürəktutmasından dünyasını dəyişib. 

Maraqlıdır ki, telekanallar və çoxsaydı dövlət KİV-ləri Milli Qəhrəmanın dəfninə maraq göstərməyib. Dəfn mərasimində təkcə hökumət üzvləri deyil, deputatlar da iştirak etməyib. Prezident Administrasiyasından yalnız dövlət başçısının köməkçisi Vahid Əliyev iştirak edib. -05C- 

***

Azərbaycanın Milli Qəhrəmanı, polkovnik Eldar Ağayev mayın 15-də infarktdan vəfat edib.

Onun Tərtərin müdafiəsi üzrə xüsusi təyinatlı batalyonu 1994-cü ilin yazında əldə etdiyi qələbələrdən sonra E.Ağayevin adı daha çox tanınmağa başlayıb.

E.Ağayevin yaratdığı bölmələr təkcə Yevlağa qədər gəlməyi planlaşdıran ermənilərin hücumlarını dəf etməyib, həm də onlara sarsıdıcı zərbə vurub.

Düşmənin bir neçə bölməsi Tərtərdə darmadağın edildikdən sonra ermənilər açıq şəkildə bildirirdilər ki, azərbaycanlılar belə döyüşə bilməzlər, onlarla Rusiyadan olan muzdlu döyüşçülər vuruşur.

E.Ağayev 1955-ci ildə Tbilisidə hərbçi ailəsində anadan olub. Sonra ailə Bakıya köçüb. 20 və 132 saylı məktəblərdə təhsil alan E.Ağayev 1972-ci ildə Bakı Ali Ümumqoşun Məktəbinə daxil olub. 

Sovet ordusunda kəşfiyyat batalyonu komandiri kimi xidmət edib, Əfqanıstanda döyüşüb.

Qarabağ münaqişəsi başlayanda Eldar Almaniyada motoatıcı bölmənin komandiri olub. O, Azərbaycana qayıdaraq öz ölkəsinin müdafiəsində iştirak etmək istədiyini bildirəndə komandanlıq ona polkovnik vəzifəsini təklif edib. Lakin zabit razılaşmayıb.

1992-ci ildə Azərbaycan ordusunda ilk xüsusi təyinatlı batalyon yaradıb. Adamları şəxsən seçərək öyrədirdi.

Bu batalyon və onun ayrı-ayrı kəşfiyyatçıları cəbhə boyu onlarla döyüş və əməliyyatlarda iştirak edib. Onlardan 18-i Milli Qəhrəman adına layiq görülüb (bəzisi ölümündən sonra).

1995-ci ilin martında bu bölmə XTPD-nin tərksilah edilməsinə cəlb olunub. O zaman o, Milli Qəhrəman adını alıb.

Sonralar nədənsə bu cür zabitlərə ehtiyac olmayıb və Eldar Ağayev Politexnik İnstitutunda hərbi hazırlıq kafedrasının rəhbəri olub, Hərbi Akademiyada dərs deyib, sonra ehtiyata buraxılıb.

Bir il əvvəl E.Ağayev daxili qoşunlar üzrə inspektor kimi xidmət göstərməyə başlayıb.-02V-