Hüquq müdafiəçiləri Avropa qurumlarını fəaliyyətsizlikdə ittiham edirlər

Bakı/29.08.17/Turan: Siyasi Məhbusların Monitorinqi Mərkəzi yaydığı bəyanatda Avropa qurumlarını insan hüquqlarının pozulması ilə əlaqədar passiv mövqeyə görə tənqidə məruz qoyub.

"Biz, keçmiş siyasi məhbuslar, hüquq müdafiəçiləri, uzun illərdir repressiyalar şəraitində, azadlığımızı, bəzən hətta həyatımızı riskə ataraq, Avropa mənəvi dəyərlərini və Avropa qanunvericilik standartlarını əsas tutaraq, qanunun aliliyi uğrunda mübarizə aparırıq. Amma son illər səylərimiz hədər gedir. Əksinə, repressiyalar daha da güclənir - əsassız həbslərin, qanunazidd məhkəmə hökmlərinin, ölümlə nəticələnən işgəncələrin sayı artıb, müstəqil və müxalif KİV orqanları aradan qaldırılıb, hökuməti tənqid edən saytlar qapadılıb. Hakimiyyətin bütün qanunazidd əməlləri cəzasız qalır", deyə Siyasi Məhbusların Monitorinqi Mərkəzinin bəyanatında bildirilir.

Bütün bunlar Avropa Şurası və onun Azərbaycanın üzvü olduğu qurumlarının passiv mövqeyi fonunda baş verir.

Azərbaycan hakimiyyəti Avropa Şurası qarşısında və Avropa İnsan Hüquqları Konvensiyası çərçivəsində insan hüquqları sahəsində öhdəliklərinə məhəl qoymur.

"Avropa İnsan Hüquqları Məhkəməsinin qərarına baxmayaraq, ReAl hərəkatının lideri İlqar Məmmədov 5 ildən çoxdur qanunsuz olaraq həbsdədir. İslam Partiyasının lideri, ilahiyyatçı Mövsüm Səmədov 6 ildən çoxdur həbsdə saxlanılır və işgəncələrə məruz qoyulur. Digər ilahiyyatçı Taleh Bağırzadə son beş ildə üç dəfə həbs edilib, sonuncu dəfə 20 il müddətinə azadlıqdan məhrum edilib", deyə Siyasi Məhbusların Monitorinqi Mərkəzinin rəhbəri Elşən Həsənov bildirib.

Bu özbaşınalığın pik nöqtəsi Turan İnformasiya Agentliyinin direktoru Mehman Əliyevin uydurma vergilərdən yayınma, qanunsuz sahibkarlıq və vəzifə səlahiyyətlərindən sui-istifadə ittihamları ilə həbsi oldu.

Cinayət təqibi və bank hesablarının dondurulması həmçinin sentyabrın 1-dən Turan-ın fəaliyyətinin dayandırılmasına gətirib çıxarıb.

Amma Avropa qurumları vəziyyətin yaxşılaşdırılması üçün heç bir real addım atmır, deyə o əlavə edib.

Belə ki, Azərbaycan hakimiyyətinin "kürü diplomatiyası" nəticəsində AŞPA-da Kristof Ştrasserin Azərbaycanda siyasi məhbus məsələləri üzrə məruzəsi qəbul edilməyib.

Pedro Aqramuntun AŞPA-ya sədrlik etdiyi dövrdə "kürü diplomatiyası" daha da inkişaf edib, vətəndaş cəmiyyəti institutları isə talan edilib.

Bu zaman "kürü diplomatiyası" ilə bağlı qalmaqalın fiqurantı olan Elxan Süleymanov Azərbaycanın AŞPA-dakı nümayəndə heyətinin üzvü olaraq qalmaqdadır.

Bəyanat müəllifləri Avropa İttifaqının da Azərbaycanda insan hüquqları ilə bağlı problemlərin həlli üçün real səylərinin olmadığını təəssüflə qeyd edirlər.

"Bizim məqsədimiz Avrointeqrasiyadır və Avropa Şurasının və Avropa İttifaqının Azərbaycanda sındırılmış həyatları "görməməsi" bizi çox məyus edir. Biz, keçmiş siyasi məhbuslar, məmur özbaşınalığına, hakimlərin qanunsuz əməllərinə, müasir həbsxanalarda işgəncələrə diqqət yetirməyi və Azərbaycan hökumətinə təzyiq göstərməyi tələb edirik", deyə Həsənov bildirib.

Siyasi Məhbusların Monitorinqi Mərkəzi 2014-cü ilin oktyabrında bir qrup keçmiş "vicdan məhbusu" tərəfindən yaradılıb. -06D-