Vəkil: Məhkəmə qərarını gözləyək

Bakı/29.08.17/Turan: "Avqustun 29-da 1 saylı Bakı İstintaq Təcridxanasında Mehman Əliyevlə görüşdüm". Bunu vəkil Fariz Namazlı bildirib.

Vəkil deyib ki, M.Əliyev avqustun 28-də təcrdrixanaya gətirilən zaman tibbi müayinədən keçib və sağlıq durumunda hər hansı problem yoxdur.

"Görüş 2 saata yaxın çəkdi, biz istintaqla bağlıı bəzi məsələləri müzakirə etdik. M. Əliyevin həbsinə hər hansı əsas olmayıb, onun barəsində hec bir ilkin sübut təqdim edilməyib. Hələlik durumu yaxşıdır, hamıya salamlar göndərdi" .

Vəkil M.Əliyevin həbsinin əsassız olması ilə bağlı apellyasiya şikayəti üzrə avqustun 30-da keçirilməsi gözlənilən prosesə də münasibət ifadə edib: "Elə bir xüsusi gözləntimiz yoxdur, sabah məhkəmə qərarını gözləməli olacağıq", deyə vəkil bildirib.

Bu gün Vergi Cinayətləri İbtidai Araşdırma Depratamentində "Turan"ın əməkdaşlarının dindirilməsi davam edib.

Xatırladaq ki, Vergilər Nazirliyinin Vergi Cinayətləri İbtidai Araşdırma Departamenti avqustun 8-də Turan-a vergidən yayınma ittihamı irəli sürüb. Avqustun 25-də Turan-ın direktoru Mehman Əliyevə Cinayət Məcəlləsinin

213.1-ci (vergidən yayınma), 308.1-ci (vəzifə səlahiyyətindən sui-istifadə) və 192.2-ci (qanunsuz sahibkarlıq) maddələri ilə ittiham irəli sürülüb, Yasamal rayon məhkməsi M.Əliyev barəsində 2 ay 15 gün müddətinə həbs-qətimkan tədbiri seçib. M. Əliyev bütün ittihamları rədd edir. -05B-