Hüquq müdafiəçiləri jurnalistlərin mənzil məsələsi ilə bağlı Prezidentə müraciət ediblər

Bakının Səbail rayonundakı “Jurnalistlər şəhərciyi” sakinlərinin Azərbaycan Respublikası Prezidentinə müraciəti üç aydan artıqdır cavabsız qalıb. 2013 və 2017-ci illərdə Prezidentin açılışını etdiyi binalarda mənzil hədiyyə almış jurnalistlərdən 30 nəfərinin imzaladığı məktubda ləğv edilmiş KİVDF-nin fəaliyyəti dövründə müəyyən edilmiş qaydada, yəni özəlləşdirilmə zamanı mənzillərin "Jurnalist evi" MMC-nin mülkiyyətinə keçirilib, daha sonra isə mənzil sahibinə bağışlama proseduru ilə verilməsinin qanunazidd və məntiqsiz olması diqqətə çatdırılıb. Jurnalistlər məsələnin mənəvi tərəfini - Prezidentin əvəzsiz və birdəfəlik bağışladığı mənzilləri nəyə görə formal olaraq "Jurnalist evi" MMC-nin hədiyyə etməsini və 278,5 manat dəyərində "bağışlanma müqaviləsi" ödənişi ilə bağlı anlaşılmazlığı dilə gətiriblər. Lakin xeyli vaxt keçməsinə və ictimailəşdirilməsinə baxmayaraq  problem hələ də həllini tapmayıb. Məsələdən xəbər tutan Azərbaycan İnsan Hüquqları üzrə Birgə İşçi Qrupunun üzvləri – hüquq müdafiəçiləri Novella Cəfəroğlu, Səidə Qocamanlı, Səadət Bənənyarlı, Dilarə Əfəndiyeva və Əvəz Həsənov da bu barədə ölkə başçısına müraciət ünvanlayıb.

Özündə maraqlı məqamları əks etdirən müraciətdə bildirilir ki, mənzillərin jurnalistlərin mülkiyyətinə verilməsi istiqamətində məmurlar - o sahəyə cavabdeh olan şəxslər əngəllət törədib və bu arzuolunmaz proses davam edir: "Belə ki, KİVDF-nin xeyir-duası ilə jurnalistlərə Sizin hədiyyə etdiyiniz mənzillərin özəlləşdirilməsini Daşınmaz Əmlakın Dövlət Reyestri Xidmətindən (DƏDRX) əldə etdiyi sənəd əsasında kommunal xidmət göstərmək üçün yaradılmış "Jurnalist evi" MMC  həyata keçirib. (?) İki binanın 360 mənzil sahibi ilə MMC arasında notarial qaydada daşınmaz əmlakın bağışlanması müqaviləsi imzalanıb. Sizin jurnalistlərə hədiyyə verdiyiniz mənzillərin, "Jurnalist evi" MMC-nin jurnalistlərə müqavilə əsasında yenidən "bağışlamasının" və buna görə onların hər birinin 287,5 manat rüsum ödəməsinin hüquqi izahını tapmaq çox çətindir.  

50 mənzilin sahibi indiyədək mənzilin özəlləşdirilməsinə dair çıxarışı (“kupça”) almayıb. Jurnalitslər Azərbaycan Respublikası Medianın İnkişafı Agentliyinə müraciət etmələrinə baxmayaraq, məsələnin həlli hələ ki mümkün olmayıb".

Hüquq müdafiəçiləri müraciəti “Möhtərəm cənab Prezident, Sizdən rica edirik ki, hədiyyə etdiyiniz mənzillərə çıxarış ala bilməyən jurnalistlərin mənzillərinə çıxarışların təmin olunması prosesinin tezləşdirilməsi və məsələnin araşdırılması ilə bağlı göstəriş verəsiniz.” cümləsiylə bitiriblər.