Hüquq müdafiəçisi İlqar Nəsibovun məhkəməsi noyabrın 5-nə təyin edilib

Oktyabrın 27-də Naxçıvan Şəhər Məhkəməsində Mehman Allahverdiyevin sədrliyi ilə hüquq müdafiəçisi İlqar Nəsibovun işi üzrə hazırlıq iclası keçirilib.

Xatırladaq ki, İ.Nəsibov avqustun 21-də Resurs Mərkəzinin ofisində Fərid Əsgərov və digər şəxslər tərəfindən döyülüb. O, çoxsaylı sınıq və zədə alıb. Hadisədən iki həftə sonra 127.1 maddəsi (sağlamlığa qəsdən az ağır xəsarət yetirmə) üzrə cinayət işi açılıb və müttəhim kimi F.Əsgərov cəlb edilib.

Lakin sonradan F.Əsgərov qarşılıqlı iddia verərək İ.Nəsibovun onu döydüyünü bildirib. Bundan sonra hüquq müdafiəçisi məsuliyyətə cəlb olunub.

İ.Nəsibov özünə qarşı ittihamı absurd sayır. Çünkü onu elə amansızcasına döyüblər ki, o, F.Əsgərova xəsarət yetirə bilməzdi. Digər tərəfdən, əgər F.Əsgərov həqiqətən əziyyət çəkibsə niyə bir aydan sonra müraciət edib.

Hazırlıq iclası zamanı İ.Nəsibov ona dövlət vəkilinin verilməsi barədə təklifdən imtina edib. Hakim işə baxılmasını noyabrın 5-nə təyin edib. Bu barədə Regional Demokratiya və QHT üzrə Resurs Mərkəzinin rəhbəri Məlahət Nəsibova bildirib. O, şahid kimi istintaqa cəlb edilib.

Xatırladaq ki, noyabrın 4-də İ.Nəsibovun döyülməsi barədə şikayətə baxılacaq.

İstintaq hüquq nüdafiəçisinə Naxçıvanı tərk etməyi qadağan edib və bu səbəbdən o, Bakıya gəlib effektiv tibbi yardım ala bilmir.

İndiyədək İlqarın üz sümüklərinin sınığı bitişməyib, cərrahi müdaxiləyə ehtiyac var.  Sifətinin sol hissəsi keyiyib və o, fizioterapiya müayinəsi  almalıdır.

Nəsibovlar cütlüyü demək olar ki, Naxçıvanda blokada vəziyyətə düşüblər.

Qeyd edək ki, əvvəlki illərdən fərqli olaraq Qərb diplomatik missiyalarının nümayəndələri regiondakı yeganə hüquq müdafiəçisinə qarşı məhkəmə prosesini monitorinq etmək üçün Naxçıvana getməyə tələsmirlər.

Qeyd edək ki, Nəsibovlar demək olar ki, hüquq-müdafiə fəaliyyətini davam etdirən son vətəndaş cəmiyyəti fəallarıdır.—06B-