Hüquq müdafiəçisi Səfərov 1 saylı İstintaq Təcridxanasında Bəxtiyar Hacıyevin həyatı üçün təhlükə olduğunu bildirir

Bakı/19.12.22/Turan: 1 saylı İstintaq Təcridxanasında ictimai fəal Bəxtiyar Hacıyevin həyatı və sağlamlığı təhlükədədir. Bu barədə "Müdafiə Xətti" hüquq müdafiə təşkilatının icraçı direktoru Rüfət Səfərov öz Facebook hesabında canlı yayımda bildirib.

Onun sözlərinə görə, dekabrın 17-də səhər saat 5-də Hacıyevi yuxudan oyadıb soyuq karserə aparıblar və 8 saat orada saxlayıblar. Bütün bu müddət ərzində onu təhqir ediblər.

"O, su istəyəndə suyu stəkana süzüb ona uzaqdan göstəriblər, amma aclıq edən adama su verilməyib", deyə Səfərov bildirib.

Hacıyevi karserdən çıxarıb istintaq təcridxanasının rəisinin yanına aparıblar, o, aclıq haqqında ərizəni yenidən yazmağı və mətndən vəzifəli şəxslərin, o cümlədən əməlləri Hacıyevin aclıq etməsinə səbəb olan DİN başçısı Vilayət Eyvazovun adını çıxarmağı tələb edib. Hacıyev bundan imtina edib.

Bundan sonra onu tibbi-sanitar hissəyə aparıblar. Kamera yoldaşlarını da oraya gətiriblər. Onlar Hacıyev aclıq etdiyinə görə döyüldüklərini bildiriblər. "Onlar Bəxtiyardan aclığı dayandırmağı tələb ediblər. Buna baxmayaraq, Bəxtiyar aclıq aksiyasını davam etdirir", deyə Səfərov bildirib.

Sonda o qeyd edib ki, Hacıyevin bundan sonra Penitensiar Xidmətin 1 saylı İstintaq Təcridxanasında saxlanılması onun həyatı və sağlamlığı üçün təhlükəlidir.

Hacıyev DTX-nin İstintaq Təcridxanasına köçürülməsini tələb edir, belə ki, Penitensiar Xidmətin rəisi keçmiş DİN işçisidir.

Səfərov həmçinin bildirib ki, Hacıyevin həyat və sağlamlığı üçün mümkün ağır nəticələrə görə məsuliyyət ölkə rəhbərliyinin, DİN, Ədliyyə Nazirliyi və Penitensiar Xidmətin rəhbərlərinin üzərində olacaq.

Səfərov özünün də təhdid edildiyini, amma həbs edilsə belə, Hacıyevin hüquqları və təhlükəsizliyi uğrunda mübarizə aparacağını bildirib. 06В