İcra hakimiyyəti rəhbəri daşqından ziyan çəkənləri FHN-ə göndərdi

Sabirabad rayonunun Axtaçı, Qasımbəyli və digər kəndlərinin yüzə yaxın sakini bazar ertəsi dövlətin 2010-cu il daşqınının nəticələrinin aradan qaldırılması üzrə öhdəliklərini yerinə yetirməsi tələbi ilə İcra Hakimiyyətinə gəliblər.

    Fermerlər vəd olunmuş pul kompensasiyalarının verilməməsindən, evlərin tikilməməsindən və təmir edilməməsindən, ən əsası isə, kənd təsərrüfatı yerlərinin bərpasında köməklik göstərilməməsindən narazıdırlar.

    Rayonun icra başçısı Nazim İsmayılov şikayətçilərə daşqının nəticələrinin aradan qaldırılması Fövqəladə Hallar Nazirliyinin səlahiyyətlərinə aid olduğunu bildirib və oraya müraciət etməyi tövsiyə edib.

    Fövqəladə hallar naziri Kəmaləddin Heydərov iyunda Sabirabadda daşqından ziyan çəkən vətəndaşlarla görüşüb və pul vəsaiti ayırmağı vəd edib. Tezliklə vəsaitin verilməsi başlanıb, lakin sonradan dayandırılıb.

    2010-cu il yaz-yay daşqınları zamanı Kür və Araz çayları boyunca 8 aran rayonunda yaşayış məntəqələrinə ziyan dəyib. Ümumilikdə 100 min ha sahə və 20 min ev su altında qalıb. 2012-ci ilin iyuluna qədər ümumilikdə təxminən 500 mln. manat ayrılıb, lakin hökumət öz vətəndaşları qarşısında öhdəliklərini yerinə yetirməyib.

    Daşqının nəticələrinin aradan qaldırılması FHN-ə, “Meliorasiya və su təsərrüfatı” ASC-yə tapşırılıb və çoxsaylı korrupsiya və fırıldaqçılıq faktları ilə müşaiyət olunub, bu, “Kür” vətəndaş cəmiyyəti qərargahının və Milli Büdcə Qrupunun hesabatlarında əksini tapıb.

    Lakin hakimiyyət mənfi halları aradan qaldırmaq yerinə repressiyalara - fəalların həbsinə və onlara qarşı təzyiqlərə əl atıb. Hazırda yerli fəallar İlham Əmiraslanov və Mirabad Rzayev həbsdədirlər.

    Bununla belə, repressiyalar və mənəvi təzyiq gözlənilən nəticəni verməyib və etiraz əhval-ruhiyyəsi artmaqda davam edir. -0-