İlham Əmiraslanova qarşı ittihamlar əsassızdır

Vəkil Samir İsayev 2010-cu il may-iyun daşqınından ziyan çəkənlərin hüquqlarını müdafiə edən və daşqının nəticələrinin aradan qaldırılmasında korrupsiyaya qarşı mübarizə aparan “Kür” vətəndaş cəmiyyəti qərargahının fəalı İlham Əmiraslanov barəsində cinayət işinə həsr olunmuş mətbuat konfransı keçirib. 

Onun sözlərinə görə, ibtidai istintaq yekunlaşıb, amma bir çox pozuntular qeydə alınıb. Nəzarət üzrə prokurora şahidlərin ifadələrində uyğunsuzluqlar, Əmiraslanovun ona fiziki təzyiq göstərilməsi ilə bağlı adlarını çəkdiyi bəzi polislərin ifadələrinin olmaması barədə məlumat verilib. Belə ki, şübhəli şəxsin xüsusilə şikayət etdiyi Seyid adlı polis istintaqa cəlb olunmayıb. Şübhəli şəxsin həbsində iştirak edən şəxslərin siyahısı işə əlavə edilməyib.

Əmiraslanov AR CM-in 228.1-ci (silah və döyüş sursatı saxlamaq, daşımaq) maddəsi ilə ittiham olunur. Bu maddədə iki ilədək icbari iş və ya üç ilədək azadlıqdan məhrumetmə cəzası nəzərdə tutulur. O, iyunun 8-də “Makarov” tapançası və onun güllələrini saxlamaq ittihamı ilə həbs edilib. Həmin gün bir neçə polis və DİN-in Mütəşəkkil Cinayətkarlığa qarşı Mübarizə İdarəsinin əməkdaşları ona hücum ediblər, başına torba keçiriblər və maşına oturdublar. Yolda Seyid adlı yerli əməliyyatçı onun kəmərinin arxasına hansısa əşya qoyub. Polis bölməsində Əmiraslanovun döyülməsində də o, xüsusi canfəşanlıq göstərib.

Avqustun 1-də vəkil xüsusi təcridxanada “Kür” qərargahının fəalına baş çəkib, o, bədənində, xüsusən polislərin döyməsi nəticəsində pərdəsi deşilən sol qulağında ağrıların azaldığını qeyd edib. İsayevin sözlərinə görə, müvəkkilinin həkimlərə şifahi müraciətləri yetərsizdir. Penitensiar Müəssisələrdə tibbi yardımı və müayinəni rəsmi olaraq tələb etmək və buna nail olmaq lazımdır.

Bundan başqa, rentgen göstərib ki, müttəhimin qabırğa nahiyəsində qırıq və ya çatlama aşkar edilməyib, bədənində qançır və sıyrıntı yoxdur, vəkil özü bunun şahidi olub.

Vəkil haqlı olaraq hesab edir ki, bu istintaqın perspektivi yoxdur. Nəzarət üzrə prokuror ittihamçıların dəlillərinin əsassız olduğu barədə qərar çıxarıb. Rəsmi qərar bu günlərdə - avqustun 8-nə qədər çıxarılacaq. Həmin tarixə qədər ibtidai istintaq müddəti başa çatacaq. İş baxılması üçün Sabirabad rayon məhkəməsinə göndəriləcək.

“Kür” vətəndaş cəmiyyəti qərargahı Əmiraslanovun həbsinin əsl səbəbinin onun 2010-cu il daşqınından ziyan çəkmiş Aran rayonunun əhalisinin hüquqlarını müdafiə fəaliyyəti olmasında israr edir. Bakı istintaq təcridxanasında həbsə alındıqdan sonra Əmiraslanov Baş Prokurorluğun DİN orqanlarında İstintaqa və Təhqiqata Nəzarət İdarəsinin rəisi Kamal Qılıcova işgəncələrə və qeyri-insani rəftara məruz qaldığı barədə şikayət yazıb.

Həbs zamanı Əmiraslanov işgəncə altında tapançanı iki ay əvvəl Araz çayının sahilində mal-qara otararkən tapdığı barədə etirafedici ifadə vermək məcburiyyətində qalıb.

Xatırladaq ki, Əmiraslanov iyunun 8-də 2010-cu il daşqınından ziyan çəkənlərin problemlərinin həlli ilə bağlı FHN rəhbəri Kəmaləddin Heydərovla görüşündən 4 gün sonra həbs olunub. Bu, nazirlə ilk görüş deyildi. 24 iyun 2010-cu ildə su altında qalmış kəndlərin sakinləri Bakıya gedən yolu bağlayaraq, Kür çayına bitişik kəndlərin sakinlərinin çöllərə köçürülməsi planına etiraz ediblər. Həmin vaxt Heydərov kənd sakinlərinin qarşısına çıxıb, Əmiraslanov da onuna söhbət edib. Sonradan köçürmə planı ləğv edilib. 5 may 2011-ci ildə Əsgərbəyli, Qasımbəyli kəndlərinin bir qrup sakini prezident İlham Əliyevin kortejinin önünə çıxıb. Prezident onlarla görüşüb və şikayətlərini dinləyib. Əmiraslanov da onunla söhbət edib. Görüşdən bir saat sonra FHN nümayəndəsi Əmiraslanova zəng edib və problemlərin həli üçün Əsgərbəyli kəndi ətrafında görüşməyi təklif edib. Əmiraslanov “Kür” qərargahına bildirib ki, o, deyilən yerə yaxınlaşdıqda oraya qara şüşəli iki ağ “Prado” gəlib, maşınlardan çıxan insanlar onu tutmağa çalışıblar, lakin o, qamışlıqlar arasından onlardan qaçıb. Sonradan ona daim psixoloji təzyiq göstərilib.

Prezident Administrasiyasının ictimai-siyasi şöbəsinin rəhbəri Əli Həsənov iyulun 2-də vətəndaş cəmiyyəti nümayəndələri ilə görüşdə bildirib ki, Sabirabadda həbs olunmuş hüquq müdafiəçisi İlham Əmiraslanovun işinə yüksək səviyyədə baxılacaq. -17D-