İmişli hakimiyyəti etirazçılarla danışıqlar aparır (yenilənib)

Səhərdən İmişlidə yaranan gərginlik günortaya yaxın bir qədər səngiyib. Belə ki, yüzlərlə sakin rayon administrasiyasının binasına gələrək sosial problemlərinin həllini tələb ediblər. 

Rayon İcra Hakimiyyətinin rəhbərliyi etirazçıların nümayəndəsini qəbul edib. Yerli mənbələr bildirirlər ki, danışıqlar davam edir. 

Yüzdən çox vətəndaş görüşün nəticəsini gözləyir.  

Bununla belə polis adamların çox olduğu yerləri nəzarətə götürüb.

Səhərdən polislə etirazçılar arasında kiçik qarşıdurma olsa da, ciddi insident baş verməyib. -06B-

İmişlidə etiraz aksiyası

Çərşənbə günü səhər İmişli rayonunun yüzə yaxın sakini rayon İcra Hakimiyyətinə gedərək sosial problemlərin həllini tələb ediblər. Yerli mənbələr Turan-a bildiriblər ki, onların arasında 2010-cu ilin daşqınları zamanı zərər çəkənlər, həmçinin digər yaşayış  məntəqələrinin sakinləri olub.

Sakinlər itirilən əmlaka və ziyan dəymiş evlərə görə ədalətli kompensasiyanın verilməsini tələb edirlər.  Analoji problemləri olan və məmurların özbaşınalığından, dövlət orqanlarının korrupsiyasından əziyyət çəkən başqa vətəndaşlarda onlara qoşulub.

Bir qrup İmişli sakini yola çıxaraq nəqliyyatın hərəkətini bağlayıb.

Rayon İcra Hakimiyyəti ilə əlaqə yaratmaq cəhdləri baş tutmayıb.-02B-