İnşaatçılar keçmiş Sovetski ərazisində yolları mayın əvvəllərinə qədər təhvil verməyi vəd edirlər

Bakı/08.04.17/Turan: Fizuli meydanı, Təzə Pir məscidi və keçmiş Sovetski ərazisində beş küçənin yenidənqurma işlərini həyata keçirən "Azəravtoyol" inşaatçıları mayın əvvəllərinə qədər bütün işləri yekunlaşdıracaqlarını iddia edirlər.

B.Məcidov (440 metr), Abdulla Şaiq (1825 metr) küçələrində işlər yekunlaşıb. Dövlət Statistika Komitəsi qarşısındakı meydan ətrafında asfaltlama və səkilərin döşənməsi işləri yekunlaşma mərhələsindədir.

Keçmiş Sovetski küçəsində (hazırki Nərimanov prospekti) 2 km-dən çox ərazidə müasir yol infrastrukturunun yaradılması və genişləndirmə işləri aparılır. Qonşu Mirzəağa Əliyev (750 metr) və Fizuli (800 metr) küçələrində də fəal iş gedir. Bütün işlərin mayın əvvəllərinə tamamilə yekunlaşdırılması planlaşdırılır, deyə məlumatda bildirilir.

Qeyd edək ki, yolların tikintisi hələ bütünlükdə inşaatın yekunlaşması demək deyil. Belə ki, sözügedən ərazidə köhnə mənzillərin söküntüsü davam edir. Buna görə yolların hazır olması onların dərhal istismara veriləcəyi demək deyil.

Bundan başqa, bu yollar yalnız kompleks şəkildə, yəni bütün istiqamətlərdə hərəkət mümkün olduqda və artıq mövcud olan yollara birləşdikdə işləyə bilər. Bütün bunları bir aydan da az müddətdə həyata keçirmək qeyri-mümkün görünür. -02D-