İntiqam Əliyev: Çox yaxın vaxtda Azərbaycan da azadlıqda olacaq (YENİLƏNİB)

Bu gün azadlığa çıxan hüquq müdafiəcisi İntiqam Əliyev evinin önündə mətbuata ilk acıqlamasını verib. O deyib: “İkili hisslər keçirirəm əslində. Plenumun qərarı barədə danışmaq istəməzdim. Azadlıqda olmağıma təbii ki, sevinirəm. Çünki ilin-günün bu vaxtında istirahət eləmək çöldə çalışan, ağır şəraitdə çalışan dostlarıma bir ədalətsizlik sayırdım. Ona görə də azadlığa çıxmağım o anlamda mənim üçün xoş bir şeydi. Yenidən yükün bir hissəsini çiyinlərimə götürəcəm. O biri tərəfdən həm də məyusam, çünki dostlarımın böyük bir hissəsi hələ də həbsdədir. Məmnuniyyətlə öz azadlığımı onların azadlığı ilə dəyişərdim”.

İntiqam Əliyev nikbindir. “Bütövlükdə proseslər gedir. Əminəm ki, çox yaxın vaxtlarda dostlarım da çöldə olacaq. Azadlıqda olacaqlar. Çox yaxın vaxtlarda Azərbaycan da azadlıqda olacaq. Buna heç bir şübhəm yoxdur. Bu qədər repressiyalar, bu qədər basqılara baxmayaraq, Azərbaycan cəmiyyəti azadlıq, demokratiya uğrunda çalışmaqda davam edir. Bu bizə ümüd verir. Bu həm də bizə orada ümüd verirdi. Dostlarımız, əqidə yoldaşlarımız, vətəndaş cəmiyyəti, siyasi partiyalar, adi insanlardan, beynəlxalq təkilatlardan aldığımız dəstək onu göstərdi ki, bu toplumun azadlıq istəyi həddindən artıq böyükdür və onu həbslərlə, basqılarla, təzyiqlərlə boğmaq mümkün deyil. Təşəkkür edirəm hər birinizə. 1 il 8 ay həbsdə yatdım bu qədər üzülmədim. Bu gün sizi çox gözlətdim bayırda. Təşəkkür edirəm hər birinizə. Minnətdaram”, -  deyə İntiqam Əliyev bəyan edib.—06В--

2016 Mart 28 (Bazar ertəsi) 18:39:54

 İntiqam Əliyevi qarşılamaq üçün 6 saylı koloniyaya gedən doğmaları, jurnalistlər və ictimaiyyət nümayəndələri koloniya administrasiyası tərəfindən aldadılıb. Belə ki, saat 18:30-a yaxın onlara bildirilib ki, İ.Əliyev artıq koloniyanı tərk edib və onu evə aparırlar.

Saat 14:00-dan koloniyanın yanında (Dərnəgül şossesi) gözləyən onlarla adama isə  deyilib ki, İ.Əliyevin azadlığa buraxılması barədə Ali Məhkəmə plenumunun qərarı hələlik daxil olmayıb. Qərar olan kimi hüquq müdafiəçisi buraxılacaq.–06D--

2016 Mart 28 (Bazar ertəsi) 15:09:07

Hüquq müdafiəçisi İntiqam Əliyev həbsdən buraxılsa da müdafiə tərəfi Avropa İnsan Hüquqları Məhkəməsində onun bəraət almasına nail olmaq niyyətindədir. Bu barədə jurnalistlərə vəkil Cavad Cavadov bildirib.

Onun sözlərinə görə, bu gün Ali Məhkəmədə işə baxılması zamanı müdafiə tərəfi əvvəlkitək cinayət işinin dayandırılmasına və bəraət verilməsinə təkid edib.

Eyni zamanda müdafiə tərəfi hüquq müdafiəçisinin səhhətilə bağlı cəzanın yumşaldılması barədə baş prokurorun kassasiya şikayətinə etiraz etməyib.

Plenumun qərarını müsbət qiymətləndirən C.Cavadov bildirib ki, müdafiə tərəfi İ.Əliyevin Avropa İnsan Hüquqları Konvensiyasında təsbit edilmiş hüquqlarının pozulmasının tanınması və onun tam reabilitasiyası ilə bağlı Avropa İnsan Hüquqları Məhkəməsinə şikayət göndərəcək.

Hüquq müdafiəçisinin oğlu Nəcmin Kamil atasının azad edilməsi barədə məhkəmə qərarını “gözlənilən qərar” adlandırıb.

“Biz bunu ədalətin bərpası hesab etmirik, çünki hökmün xarakteri ittihamedici olaraq qalıb. Lakin atamın səhhəti və fəaliyyətini davam etdirməsi baxmından azadlığa buraxılması vacibdir”, - o vurğulayıb.

Hüquq müdafiəçisinin qızı Nərmin Kamilsoy deyib: “Əlbəttə, biz bəraət veriləcəyini gözləyirdik, çünki bu, həbs ədalətsiz idi. Ancaq buna baxmayaraq, biz sevinirik. İndi o, müalicə alar, hüquq fəaliyyəini davam etdirə və digər siyasi məhbuslara yardım edə bilər.

Biz onun vəkillərinə təşəkkür edirik, onlar çox çalışıblar. Bütün beynəlxalq təşkilatlara, xaricdəki dostlara, bu müddətdə bizi dəstəkləyən və bir an tək qoymayan hər kəsə təşəkkür edirik”, -N.Kamilsoy vurğulayıb.06D--

2016 Mart 28 (Bazar ertəsi) 14:01:06

Azərbaycan Ali Məhkəməsinin Plenumu İntiqam Əliyevin cəzasının yüngülləşdirilməsi haqqında qərar qəbul edib. Məhkəmə 7,5 il azadlıqdan məhrumetmə cəzasını 5 il şərti cəza ilə əvəz edib.

Ali Məhkəmə İntiqam Əliyevin dərhal azad edilməsinə qərar verib, xəbəri hadisə yerindən Turan-a müxbiri verib. Vəkil Fariz Namazlı da bunu təsdiq edib. -16D-

2016 Mart 28 (Bazar ertəsi) 12:33:00

Bazar ertəsi saat 12-də Azərbaycan Ali Məhkəməsinin Plenumunun iclası başlayıb. İclasda hüquq müdafiəçisi İntiqam Əliyevin cəzasının yüngülləşdirilməsi haqqında kassasiya protestinə baxılır.

Plenumun iclasına yalnız vəkillər Cavad Cavadov və Şəhla Hümbətova buraxılıb. Media, ictimaiyyət və diplomatik missiya nümayəndələri zala buraxılmayıb. Proses qapalı deyil, amma AM Plenumunun iclaslarında kənar şəxslərin iştirakı praktikası nəzərdə tutulmayıb.

* İntiqam Əliyev 2014-cü il avqustun 8-də iqtisadi cinayətlər törətmək ittihamı ilə həbs olunub. 2014-cü il aprelin 22-də o, 7,5 il müddətinə azadlıqdan məhrum edilib. 2015-ci ilin iyulunda Bakı Apellyasiya Məhkəməsi müdafiə tərəfin şikayətini təmin etməyib və hökmü qüvvədə saxlayıb. Fevralın 24-də Azərbaycan Ali Məhkəməsi də İntiqam Əliyev barəsində hökmü qüvvədə saxlayıb. Lakin bu həftə baş prokuror "həddindən artıq ağır" olduğu üçün hökmə yenidən baxılması ilə bağlı Ali Məhkəməyə müraciət edib.

İntiqam Əliyev Amnesty International tərəfindən "vicdan məhbusu" kimi tanınıb. ABŞ, Aİ, AŞ, ATƏT və digər beynəlxalq qurumlar israrla onun və digər siyasi məhbusların azad edilməsini tələb edib. -16D06-

2016 Mart 27 (Bazar) 13:25:32

Martın 28-də Ali Məhkəmənin Plenumunda hüquq müdafiəçisi İntiqam Əliyevin işinə baxılarkən onun özü iştirak etməyəcək. İntiqam Əliyevin vəkili Cavad Cavadov belə deyir. Onun sözlərinə görə, təqsirləndirilən şəxsin Plenumun iclasına qatılma təcrübəsi yoxdur və həbsdə olan hüquq müdafiəçisininözü də iştirak üçün müraciət etməyib.

Cavad Cavadov baş prokuror Zakir Qaralovun apellyasiya protestinin yanlış anlaşıldığına diqqət çəkir. Çünki protestdə bəraətdən deyil, yalnız cəzanın ağırlığından söhbət gedir. Zakir Qaralov İntiqam Əliyevə münasibətdə bir sıra yüngülləşdirici halların, o cümlədən hüquq müdafiəçisinin səhhətindəki problemlərin nəzərə alınmamasından və şərti cəza məsələsinin müzakirə edilməməsindən narazı qalıb. Müraciətdə yalnız cəzanın dəyişdirilməsi məsələsi vurğulanır.

«Amma biz müdafiə tərəfi olaraq, əvvəlki mövqeyimizdə qalır və cinayət işinə bəraətverici əsaslarla xitam verilməsini istəyirik. Plenumun iclasında da bunu xahiş edəcəyik».Cavad Cavadov belə deyib.

Hüquq Maarifçilik Cəmiyyətinin prezidenti İntiqam Əliyev 2014-cü il avqustun 8-də həbs olunub. Hüquq müdafiəçisi qanunsuz sahibkarlıq, mənimsəmə, vergidən yayınma kimi ittihamlarla 7 il 6 ay azadlıqdan məhrum edilib. Bakı Apellyasiya Məhkəməsi və Ali Məhkəmə də Bakı Ağır Cinayətlər Məhkəməsinin bu hökmünü qüvvədə saxlayıb.

İntiqam Əliyev ittihamları rədd edir və insan haqlarının müdafiəsi üçün gördüyü işlərə, xüsusən Avropa Məhkəməsinə göndərilən şikayətlərin hazırlanmasına və bu qurumda Azərbaycan vətəndaşlarının müdafiəsini gerçəkləşdirdiyinə görə cəzalandırıldığını bildirir.

«Amnesty International» beynəlxalq insan haqları təşkilatı İntiqam Əliyevi «vicdan məhbusu» elan edib.—06В--