İntiqam Əliyev: Əsgərin ölümünə görə prezident də məsuliyyət daşıyır

Əsgər Ceyhun Qubadovun ölümünə görə təkcə onun qatilləri deyil, bu işi ört-basdır etməyə çalışan ölkə hakimiyyəti də məsuliyyət daşıyır. Hüquqi Maarifləndirmə Cəmiyyətinin rəhbəri İntiqam Əliyev əsgərin ölümünü belə şərh edib.

“Əsgərlər yalnız Azərbaycan ordusunda öldürülmür. Sual doğuran dövlətin nədən bu faktları araşdırmaq istəməməsidir. Hiddət doğuran dövlətin nədən cinayətkarları himayə etməsidir. Normal ölkələrdə bu cür faktların hər biri ciddi araşdırma predmeti olur, ictimaiyyətə ətraflı məlumat verilir, ordu üzərində ictimai nəzarət var, ordudan seçkiləri saxtalaşdırmaq və siyasi mübarizədə digər çirkin məqsədlər üçün istifadə etmirlər və s. Əgər o şəkillər olmasaydı, sosial şəbəkələrdə bu müzakirələr olmasaydı, o əsgərin ölümü də onlarla, yüzlərlə digərlərinin kimi ürəkçatımazlığının, intiharın, silahla ehtiyatsız davranmanın ayağına yazılacaqdı”, deyə Əliyev qeyd edib. 

Cinayətkar təkcə o əsgəri döyüb öldürən deyil, həm də bu günə qədər minlərlə əsgərin qanı batdığına, cinayətkarlar cəzalarını almadıqlarına görə indiki hakimiyyətdir. Bu ölümlərin məsuliyyəti həm də müdafiə naziri Səfər Əbiyevin, ali baş komandan İlham Əliyevin boynundadır. 

Əsgərinin döyülməsinə, alçaldılmasına, öldürülməsinə göz yuman, onun qanını batıran baş komandanı, müdafiə naziri, baş prokuroru, ali məhkəməsi olan ölkənin sabah müharibə olsa, onu udmaq şansı yoxdur, deyə hüquq müdafiəçisi bildirib.

İntiqam Əliyev əsgərin ölümünün “siyasiləşdirilməməsi” barədə iddiaları təkzib edib. “Bu ordu prezident və parlament seçkilərində o qapalı kazarmalarda 18 yaşlı gəncləri zorla İlham Əliyevə və ya hakim partiyanın namizədlərinə səs verməyə məcbur ediləndə siyasiləşib. “Ordunu siyasiləşdirməyin” deyənlərin hakimiyyətləri üçün ciddi təhlükə yarananda o silahları xalqına qarşı çevirəcəyinə heç kəsin şübhəsi olmasın”, deyə İntiqam Əliyev fikrini tamamlayıb. -06D-