İslam Partiyasının sədr əvəzinin məhkəmə prosesi mayın 6-na təxirə salınıb

Bakı/29.04.21/Turan: Aprelin 29-u Bakı Ağır Cinayətlər Məhkəməsində hakim Faiq Qəniyevin sədrliyi ilə Azərbaycan İslam Partiyasının sədr əvəzi İlham Əliyevin qapalı məhkəmə prosesi keçirilib.

Əvvəlki məhkəmə prosesində dövlət ittihamçısı İlham Əliyevə 18 il,  onunla birlikdə həbs olunan Mehman Rzayev üçün isə 16 il iş istəyib.

Xatırladaq ki, İlham Əliyev ötən ilin fevral ayında saxlanılıb. Ona Cinayət Məcəlləsinin 274-cü (vətənə xəyanət) maddəsi ilə ittiham irəli sürülüb. Mehman Rzayev də eyni maddə ilə ittiham olunur.

Nardaran ağsaqqalı Natiq Kərimov dindarların həbs olunması ilə bağlı öz fikrini bildirib. O inanclı şəxslərə verilə ittihamların qondarma olduğunu deyib.

“Araşdırma etsəniz görərsiniz ki, vətənə xəyanət maddəsi ilə ancaq dindarları həbs edirlər. Mənim özümü də bu maddə ilə təqsirli bilibər. Sübut etsinlər ki, mən vətənə harada və nə vaxt xəyanət etmişəm. İslamçıların həbs olunması dövlətçiliyin əleyhinədir”, deyə qeyd edib.

Növbəti məhkəmə prosesi mayın 6-na təxirə salınıb.

Azərbaycan İslam Partiyası 1991-ci ildə Nardaran qəsəbəsində təsis edilib. Partiya dövlət qeydiyyatından 1992-ci il sentyabrın 20-də keçib. 1995-ci ildə partiya sədri Hacı Əlikram İrana casusluqda ittiham olunaraq həbs edilib və partiyanın dövlət qeydiyyatı da Azərbaycan Respublikası Ali Məhkəməsi tərəfindən ləğv edilib.

Daha sonra partiyanın sədri olan Mövsüm Səmədov 2011-ci ildə bir neçə tərəfdarı ilə qanunsuz silah saxlamaq, hakimiyyətin ələ keçirilməsi və s. ittihamlarla müxtəlif müddətə həbs olunublar. Mövsüm Səmədov 12 il həbs cəzası alıb.

Həmin zamandan Mövsüm Səmədovun birinci müavini olan İlham Əliyev partiyanın sədr əvəzi vəzifəsini icra etməyə başlayıb.—30D-