İsmayıllı hadisələri üzrə prosesdə videolara baxış keçirilir (YENİLƏNİB)

Fevralın 10-da Şəki Ağır Cinayətlər Məhkəməsində İsmayıllı hadisələri üzrə prosesdə videomateriallara baxış davam edib. 

“Azadlıq” radiosunun videokadrlarında (2013-cü il yanvarın 23-də Elçin İsmayıllı çəkib) “Çıraq” otelinin qarşısına toplaşmış qəzəbli insanlar görünür. Həmçinin keçmiş rayon rəhbərinin villasında avtomobilin yandırılması lentə alınıb. Lakin qaranlıq  olduğundan adamların üzlərini seçmək olmur.

Sonra Müsavat Partiyasının sədr müavini Tofiq Yaqublunun və REAL hərəkatının lideri İlqar Məmmədovun İsmayıllıdan çıxdıqdan sonra audiomüsahibələri dinlənilib. Müsahibə saat 17.40-a yaxın birbaşa efirdə yayımlanıb. Bu, göstərir ki, T.Yaqublu və İ.Məmmədov İsmayıllını tərk ediblər və yanvarın 24-də səhər və axşam polislə aksiya iştirakçıları arasında toqquşmaların iştirakçısı ola bilməzlər.

T.Yaqublu və İ.Məmmədov İsmayıllıda saat 16:00-dan 17:00-dək – şəhərdə sakitlik olanda olublar.

Nümayiş etdirilən digər bir videosüjetdə görünür ki, T.Yaqublu jurnalistlərlə bir yerdə dayanıb və vəziyyət sakitdir. Hakim bu videoları iş materiallarına daxil edib. Lakin sübut kimi tanımayıb. Proses fevralın 11-də davam edəcək.—06D--

2014 Fevral 10 (Bazar ertəsi) 13:44:36

Şəki Ağır Cinayətlər Məhkəməsində İsmayıllı hadisələri üzrə proses davam edir.

Fevralın 10-da Vüqar Ələkbərov (keçmiş əmək və əhalinin sosial müdafiəsi nazirinin oğlu) və onun qohumu Elxan Ələkbərov (İsmayıllı Rayon İcra Hakimiyyətinin keçmiş başçısı Nizami Ələkbərovun oğlu) zərərçəkən qismində çıxış ediblər.

V.Ələkbərov bildirib ki, 2013-cü il yanvarın 23-24-də yandırılan “Çıraq” oteli ona məxsus olub. Lakin mehmanxana “Vafi” turizm firmasının icarəsində olub. O əlavə edib ki, həmin vaxt Bakıda olub.

Dəyən ziyana baxmayaraq, V.Ələkbərov bildirib ki, müttəhimlərə qarşı heç bir iddiası yoxdur.

Onun qohumu da deyib ki, hadisələr zamanı Bakıda olub. İğtişaşlar zamanı onun iki avtomobili yandırılıb, evin bir hissəsinə ziyan dəyib.

Lakin o da iddialardan imtina edib. 

Sonra prokuror videomaterialları təqdim edib.

Öz növbəsində Müsavat Partiyasının sədr müavini Tofiq Yaqublu və REAI hərəkatının lideri İlqar Məmmədovun vəkilləri onlarda, əsasən “Azadlıq” radiostansiyasında olan videoya baxmağı təklif ediblər. Bunun cavabında hakim deyib ki, “təqdim edin, baxarıq”.

Vəkil Fuad Ağayev jurnalist İdrak Abbasovun məhkəməyə çağırılmasına və onda olan videoya baxılmasına təkid edib. Lakin hakim qeyri-müəyyən şəkildə deyib ki, “gətirin onu, müzakirə edərik”.

Sonra ANS, ATV, Lider telekanallarının videokadrlarına, həmçinin bəzi müttəhimlərin dindirilməsinlə bağlı operativ çəkilişlərə baxış olub.

Telekanalların videolarında bəzi müttəhimlərin camaatın arasında olduğu görünüb, lakin onlar qanunazidd hərəkətlər etməyiblər.

Günün ikinci yarısında proses davam edəcək.

2013-cü il yanvarın 23-də İsmayıllıda “Çıraq” otelinin işçiləri sərxoş vəziyyətdə ikən qəza törədiblər və yerli sakinləri təhqir ediblər. Buna cavab olaraq qəzəblənmiş adamlar “Çıraq” otelini yandırıblar. Yanvarın 24-də polislə yerli sakinlər arasında qarşıdurma yaranıb. Sakinlər rayon rəhbərliyinin istefasını tələb ediblər. Məhkəmə qarşısında 18 nəfər, o cümlədən  Müsavat Partiyasının sədr müavini Tofiq Yaqublu və REAI hərəkatının lideri İlqar Məmmədov dayanıb. —007C-