İstintaq təcridxanasında məhbusun qulağını kəsiblər?

Qanunsuz narkotik dövriyyəsində ittiham olunan 33 yaşlı Hünər Cəfərov   polisdə saxlanılan zaman fiziki təzyiqə və işgəncələrə məruz qalıb. Bu barədə Turan-a onun vəkili Elmar Süleymanov bildirib.

Onun sözlərinə görə, Cəfərov martın 20-də DİN-in Narkotiklərə qarşı Mübarizə Baş İdarəsinin əməkdaşları tərəfindən saxlanılıb, ayın 22-də isə məhkəmə onun etirafedici ifadə almaq məqsədilə işgəncəyə məruz qoyulduğu haqqında bəyanatına məhəl qoymadan onu həbs edib.

Vəkil martın 23-də Cəfərovun müdafiəsinə qoşulub, lakin ayın 29-da onu məhbusun yanına buraxmayıblar. Məhkəmənin Cəfərovun istintaq təcridxanasına köçürülməsi haqqında qərarına baxmayaraq, o, Narkotiklərə qarşı Mübarizə Baş İdarəsində, daha sonra isə DİN-in Mütəşəkkil Cinayətlərə qarşı Mübarizə Baş İdarəsində saxlanılıb. Burada da ona fiziki təzyiq göstərilib.

Sonradan polisdə müxtəlif mərhəm və kremlər sürtərək, məhbusun bədənindəki zorakılıq izlərini gizlətməyə çalışıblar.

Eyni zamanda, Cəfərovun saxlanıldığı yer doğmalarından və vəkilindən gizlədilib. Yalnız vəkilin yuxarı instansiyalara müraciətindən sonra martın 28-də Cəfərovu gizlicə istintaq təcridxanasına köçürüblər və ayın 29-da, nəhayət, Süleymanov onunla görüşüb.

İstintaq təcridxanasının həkimi, çoxsaylı zorakılıq izlərinə baxmayaraq, Cəfərovun yalnız gözünün altında göyərmə qeydə alıb.

Bu gün Nəsimi rayon məhkəməsində vəkilin müvəkkili ilə görüşməsinə imkan verməyən müstəntiqin qanunsuz hərəkətlərindən şikayəti üzrə proses keçirilib.

Prosesdə Süleymanov məhbusun qulağının bir hissəsinin kəsildiyini görüb.

“Mən Cəfərovu sonuncu dəfə - aprelin 2-də istintaq təcridxanasında gördükdə belə bir şey yox idi”, deyə vəkil bildirib.

Müstəntiqlə məhkəmə çəkişməsinə gəlincə, iclas aprelin 15-nə qədər təxirə salınıb.

Penitensiar Xidmətdən şərh almaq hələlik mümkün olmayıb. -06В-