İstirahət günlərində küçəyə çıxmaq, dənizə girmək olmaz

Bakı/05.06.20/Turan: İyunun 6-8-də Bakı, Sumqayıt, Gəncə, Lənkəran və Abşeron rayonunda sərt karantin günlərində yol polisi karantini pozan şəxsi avtomobil sahiblərini ciddi cəzalandıracaq. Bu barədə bu gün DİN Dövlət Yol Polisi ictimaiyyətlə əlaqələr şöbəsinin rəhbəri Kamran Əliyev bildirib.

O xatırladıb ki, böyük kateqoriya vətəndaşlara evdən çıxmaq qadağan edilib. Yalnız qəza, xilasetmə, təcili yardım avtomobillərinin və bu orqanların işçilərinin hərəkətinə icazə verilir. Bu şəxslər yalnız xidməti avtomobillərdə hərəkət edə bilərlər. Şəxsi maşınlardan istifadə qadağandır.

Şəxsi nəqliyyatdan istifadəyə görə: fiziki şəxsə 100-200 manat, vəzifəli şəxsə 1500-2000 manat, hüquqi şəxsə  2000 - 5000 manat cərimə tətbiq ediləcək. Pozuntunun xarakterindən və pozucunun kimliyindən asılı olaraq bir aya qədər həbs mümkündür, Kamran Əliyev bildirib.

Bakılıların çoxu istirahət günlərində bağlarda dincəlir, lakin bu dəfə onlara bağdan çıxmaq qadağan edilib. Buna görə də dənizə girmək mümkün olmayacaq. Bu barədə artıq FHN xəbərdarlıq edib.”"İyunun 6-8 - də çimərliklərə getmək qəti qadağandır”, - FHN-in məlumatında deyilir.-02D-