Jurnalist Seymur Həzinin işi üzrə məhkəmə dinləmələri başlayıb

Dekabrın 4-də jurnalist Seymur Həzinin işi üzrə məhkəmə prosesində müttəhimlər çıxış ediblər.

Xatırladaq ki, S.Həzi avqustun 29-da saxlanılıb. Ertəsi gün Baş Prokurorluq bildirib ki, S.Həzi Bakı sakini M.Həsənovu başından butılka ilə vurub. Jurnalistə qarşı CM-in 221.3 maddəsi (silah və ya silah kimi istifadə olunan əşyanın tətbiqilə xuliqanlıq törətmək) cinayət işi qaldırılıb. Sonradan M.Həsənov da saxlanılıb. Lakin bir neçə gündən sonra ev həbsi adı ilə buraxılıb və  sonra yenidən həbs olunub.

İnsidentə M.Həsənovun iradları səbəb olub. Belə ki,o, küçədə S.Həziyə yaxınlaşaraq nə üçün Facebook-da ona cavab vermədiyini soruşub. Bundan sonra jurnalistə hücum edərək onu yumruqlayıb. Özünü müdafiə edən S.Həzi ona cavab zərbəsi endirib.

Abşeron Rayon   Məhkəməsində keçirilən iclas zamanı öncə S.Həzinin vəkili Adil İsmayılov hər iki müttəhimin –Seymur Həzi və Məhərrəm Həsənovun zərərçəkən kimi tanınması barədə vəsatət qaldırıb.

O, diqqəti ona yönəldib ki, iş üzrə iki müttəhim var, lakin zərərçəkən yoxdur, halbuki, onların hər ikisi xəsarət alıb.

Dövlət ittihamçısı vəsatətə etirazını bildirməyib, lakin məhkəmə onu təmin etməyib.

M.Həsənov bildirib ki, özünü günahkar saymır. O, ifadə verməkdən imtina edib.

İstintaqın məlumatına görə, M.Həsənov S.Həziyə iradını bildirib ki, S.Həzi Facebook-da onun mesajlarına cavab vermir və jurnalist cavab əvəzinə onu guya təhqir edib.

M.Həsənov vəkillərin suallarına “yadımda deyil”, “hər şey iş materialında var”, “cavab vermək istəmirəm, buna ixtiyarımvar” kimi yayındırıcı cavablar verib.

Məlum olub ki, onun Facebook haqqında, əsasən Həzi profili haqda bilgisi yoxdur. O, Həzi profilinin yuxarı hissəsində kimin fotosunun yerləşdirilməsindən, “dostlar” bölümündə kimlərin olmasından xəbərsizdir.

M.Həsənovun konkret olaraq jurnalistə nə yazması barədə S.Həzinin sualına cavab verə bilməyib və xatırlamadığını bildirib.

S.Həzi bildirib ki, jurnalist fəaliyyəti ilə əlaqədar ona qarşı təxribat törədilib. “Bir həftə əvvəl mənə məlumat verilmişdi ki, həbs olunacam”, -o vurğulayıb.

O həmçinin qeyd edib ki, heç bir günahı yoxdur və özünümüdafiə məqsədilə hərəkət edib.

Şahid kimi dindirilən polislər Emil Dadaşov, Asif Səlimli və Bəhruz Sadıqzadə bildiriblər ki, istintaqa ifadə vermək üçün birlikdə gəliblər. Lakin dindirmələr müxtəlif tarixlərdə göstərilib.

Bundan əlavə, ibtidai istintaqa verilən ifadələr zamanı polislər deyiblər ki, hər iki müttəhimin saxlanması prosesi 15-20 dəqiqə çəkib. Məhkəmədə isə bildiriblər ki, bu 2-3 dəqiqə vaxt aparıb.

Ceyranbatan qəsəbəsindəki mağazanın satıcısı S.Həzinin M.Həsənovu vurduğunu görməyib və ibtidai istintaqda demədiyi sözləri onun adına çıxıblar.

Şahid deyib ki, o, yalnız S.Həzinin qaçdığını görüb.

Növbəti məhkəmə iclası dekabrın 18-nə təyin edilib.—06В--