Jurnalist Xədicə İsmayılovanın işi üzrə ibtidai istintaq başa çatıb

Baş Prokurorluğun Ağır Cinayətlər üzrə İstintaq İdarəsi iyunun 22-də jurnalist Xədicə İsmayılovanın işi üzrə ibtidai istintaqın başa çatdığını elan edib. Bu barədə Turan-a X.İsmayılovanın vəkili Fəxrəddin Mehdiyev bildirib.

Onun sözlərinə görə, ayın 23-dən  X.İsmayılova və onun vəkilləri cinayət işinin materialları ilə ayrı-ayrılıqda tanış olmağa başlayacaqlar.

F.Mehdiyev xatırladıb ki, öncə X.İsmayılovaya qarşı CM-in 125-ci maddəsi (ölüm həddinə çatdırma) ilə ittiham olunub. Sonradan ona qarşı  CM-in 179.3.2 (külli miqdarda mənimsəmə), 192.2.2 (qanunsuz sahibkarlıq), 213.1(vergi ödəməkdən yayınma)  və  308.2 (vəzifə səlahiyyətlərindən sui-istifadə) maddələri ilə ittiham irəli sürülüb.

Eyni zamanda X.İsmayılovaya qarşı 284.2-ci maddə (dövlət sirrinin açıqlanması) üzrə cinayət icraatı dayandırılıb.

Vəkil hesab edir ki, X.İsmayılovaya qarşı bütün ittihamlar əsassızdır.

“Tural Mustafayev dəfələrlə KİV-ə bildirib ki, jurnalistə qarşı şikayətindən imtina edir. O deyib ki, Xədicəyə qarşı ifadələri təzyiq altında verib. Lakin istintaq hesab edir ki, bu bəyanata hüquqi qiyməti yalnız məhkəmə verə bilər”, - vəkil qeyd edib.

Onun fikrincə, ibtidai istintaqın dəlilləri “obyektiv deyil”.

Vəkilin sözlərinə görə, cinayət materialları ilə tanış olduqdan sonra müdafiə tərəfi əlavə vəsatətlərlə çıxış edəcək.

X.İsmayılova ittihamları siyasi motivli hesab edir.

Amnesty İnternational beynəlxalq hüquq-müdafiə təşkilatı X.İsmayılovanı “vicdan məhbusu” kimi tanıyıb. Bir çox beynəlxalq təşkilatlar onun azadlığa buraxılmasını tələb edirlər.—03B--