Jurnalistə cinayət işi açıldı

Bakı/14.03.20/Turan:  Azərbaycan Xalq Cəbhəsi Partiyasının üzvü, "Azadlıq" qəzetinin müxbiri Təzəxan Mirəmliyə Cinayət Məcəlləsinin 221.1-ci (Xuliqanlıq) maddəsi ilə cinayət işi açıldı. 

Bu barədə Turana Mirəmlinin özü məlumat verdi. Onun sözlərinə görə, ona qarşı cinayət işini özünü videobloqer kimi təqdim edən Ata Abdullayev tərəfindən verilmiş şikayəti əsasında açılıb. "Fevralın 26-da AXCP Xocalı abidəsini ziyarət edən zaman Abdullayev söyüş söyürdü və mən ona yaxınlaşaraq xəbərdarlıq etdim, o isə polisə guya onu vurmuşam şikayət edib". 

Mirələmli bildirdi ki, hadisədən sonra onu Xətai Rayon 37-ci polis bölməsinə dəvət edib izahat alıblar. "Fevralın axırı idi çağıranda izahat verdim, dedilər ekspertiza keçiriləcək. Sonra isə polisdən heç bir xəbər çıxmadı. Mən özüm işlə maraqlanmaq üçün bir dəfə polis bölməsinə getdim, dedilər tədqiqatçı məzuniyyətdədir. Bundan sonra isə heç bir məlumat ala bilmədim".

Jurnalist əlavə etdi ki, ona qarşı cinayət işinin açılması barədə sosial şəbəkələrdən məlumat aldı. "Ata Abdullayev mənə qarşı cinayət işin başlaması ilə bağlı qərarı öz səhifəsində paylaşdı. Qərarda deyilir ki, cinayət işi Xətai Rayon Polis İdarəsi tərəfindən martın 11-də açılıb. Ora dəfələrlə zəng vursam da, telefonu götürən olmayıb və mənim evimə heç bir kağız gəlməyib". 

Mirələmli qərarda qeyd olunmuş detallara da münasibət bildirib. "Orada deyilir ki, mən Abdullayevi sifət nahiyəsinə vuraraq ona çənə nahiyəsinin sıyrığı və qançırı kimi sağlamlığa zərər vurmayan xəsarətlər yetirdim. Qəti razı deyiləm. Mən onu vurmamışam". 

Məsələ ilə bağlı Ata Abdullayev bildirdi ki, fevralın 26-da Təzəxan Mirələmli onun peşə fəaliyyətinə mane olaraq ona hücum çəkdi. "Mən hüquqi müstəvidə Mirələmli ilə mübarizə aparacam, öz hüquqlarımı qoruyacam. Qoy qanun pozan insanlara bir daha dərs olsun ki, qanunlara və adamın peşə fəaliyyətinə hörmət etmək lazımdır. Mirələmli peşə fəaliyyəti ilə məşğul olan şəxsə hücum çəkəndə bilmirdi ki, bir gün məhkəmə qarşısında cavab verəcək? Mən hüquq-mühafizə orqanlarına işin obyektiv baxıldığına görə minnətdaram. Dəfələrlə şikayətlər göndərdim və düşünürdüm ki, bu prosesdə soyuqluq var, amma yanıldım. Hazırda araşdırma davam edir və inanıram ki, tez bir zamanda Mirələmli məhkəmə qarşısına çıxarılaraq azadlıqdan məhrum olunacaq". 

Məsələ ilə bağlı Daxili İşlər Nazirliyindən və Xətai Rayon Polis İdarəsindən münasibət öyrənmək mümkün olmayıb.