Jurnalistin həbs müddəti daha 3 ay uzadılıb

Bakı/29.08.17/Turan: Avqustun 29-da Bakının Nəsimi Rayon Məhkəməsi "Kanal 13" İnternet Televiziyasının Bakı bürosunun rəhbəri Əziz Orucovun barəsində seçilmiş həbs qətimkan tədbirinin dekabrın 17-dək (3 ay) uzadılması barədə qərar qəbul edib. Bu barədə Turan-a vəkil Elçin Sadıqov bildirib.

Vəkil qərardan apellyasiya şikayəti verəcəyini bildirib.

"İstintaq orqanı həbs qətimkan tədbirinin uzadılması ilə bağlı məhkəməyə hər hansı bir sübut təqdim etmədi", - vəkil qeyd edib.

Onun sözlərinə görə, Əziz Orucov məhkəmədə çıxış edərək istintaq orqanına etiraz edib. O bildirib ki, həbsdə olmasına, ümumiyyətlə, əsas yoxdur", - E.Sadıqov deyib.

"Kanal 13" İnternet Televiziyasının Bakı bürosunun rəhbəri Əziz Orucova mayın 2-də Nəsimi Rayon Məhkəməsinin qərarı ilə 30 sutka inzibatı həbs cəzası verilib. O, İnzibati Xətalar Məcəlləsinin 535.1-ci (polisə müqavimət) maddəsi ilə ittiham edilib.

Ə.Orucovun inzibati cəzası başa çatan gün - iyunun 1-də ona cinayət ittihamı irəli sürülüb. Baş Prokurorluğun Ağır Cinayətlərə dair İşlər üzrə İstintaq İdarəsində Ə.Orucovun barəsində Cinayət Məcəlləsinin 192.2.2-ci (qanunsuz sahibkarlıq) və 308-ci (vəzifə saxtakarlığı) maddələri ilə cinayət işi açılıb.

Cinayət işi Ə.Orucovun təsisçisi olduğu "Qafqaz Media Təhqiqatları" İctimai Birliyi və "Kanal 13" ilə bağlıdır.

Jurnalist ittihamları qəbul etmir.-03B-