Jurnalistlər Yasamal polisində aparılıb

Bakı/15.05.21/Turan: Dünən, mayın 14-də gecə saatlarında jurnalistər polis bölməsinə aparılıb. Bu barədə Turan-a müstəqil jurnalist Elməddin Şamilzadə məlumat verib.

Jurnalistin sözlərinə görə, onu Yasamal rayonu 26-cı polis bölməsinə apararaq barəsində protokol tərtib ediblər: "Mən kafenin qarşısında dayanaraq siqaret çəkirdim. Maska çənəmdə idi. Bu an polis əməkdaşları bizə yaxınlaşanda maskasız olanlar qaçdılar. Mən kafenin içinə keçəndə polis əməkdaşı mənə yaxınlaşdı "qaçan kim idi" sualını verdi. Mən də bu şəxsi tanımadığıma görə bilmədiyimi dedim. Məni məsələni aydınlaşdırmaq üçün bölməyə dəvət etdilər. Etiraz etmədim".

Elməddin Şamilzadə qeyd edib ki, dostları hadisə ilə bağlı "102" xidmətinə müraciət ediblər: "Bölmədə mənə deyiblər ki, səni buraxırıq, amma dostların şikayətini geri çəksinlər. İmtina edəndə isə barəmdə İnzibati Xətalar Məcəlləsinin 211.3 maddəsi ilə protokol tərtib ediblər və 200 manat məbləğində cərimə yazıblar".

Polis bölməsinin qarşısında hadisəni işıqlandıran reportyor Nurlan Qəhrəmanlı isə Turan-a bildirib ki, onu peşə fəaliyyətini yerinə yetirdiyinə görə bölməyə aparıb fiziki təzyiq göstəriblər. "26-cı polis bölməsinin qarşısına jurnalist Elməddin Şamilzadənin saxlanılmasına görə getmişdim. Orada jurnalist Əminə Məmmədovanın telefonunun polis əməkdaşları tərəfindən əlindən alınmasından etiraz etdim. Video çəkəcəyimi bildirəndə üç polis serjantı məni sürüyə-sürüyə polis bölməsinə saldı. Orada mənə zorakılıq göstərdilər və ailə üzvlərimi təhqir elədilər".

Reportyor qeyd edib ki, İnzibati Xətalar Məcəlləsinin 510-cu maddəsi ilə 50 manat cərimə olunduqdan sonra sərbəst buraxılıb. "Yazılıb ki, guya ki, mən polis əməkdaşını təhqir etmişəm. Mən heç kəsi təhqir etməmişəm", - o bildirib.

Jurnalistlər bildiriblər ki, məsələ ilə bağlı mayın 15-də Bakı Şəhər Baş Polis İdarəsinə dəvət olunublar: "Bizi rəis müavini Vüqar Ələkbərov qəbul etdi. Profilaktik xarakterli söhbət oldu, o, bizə jurnalistlərlə bağlı iradlarını bildirdi, biz də öz növbəmizdə polisdə gördüyümüz nöqsanlar barədə ona danışdıq. Bizə bildirdi ki, məsələ araşdırılacaq, protokollar haqsız yerə yazılıbsa, ləğv olunacaq".

Daxili İşlər Nazirliyinin mətbuat xidmətinin kütləvi informasiya vasitələri və ictimaiyyətlə əlaqələr şöbəsinin rəisi Elşad Hacıyev isə bildirib ki, Nurlan Qəhrəmanlının təzyiqə məruz qalması ilə bağlı iddialar tam əsassız və yalandır. Onun və Elməddin Şamilzadənin saxlanılması ilə bağlı qərar yoxdur. -0-