Keçmiş MTN əməkdaşlarının məhkəməsində

Bakı/04.05.17/Turan: Cümə axşamı Bakı Hərbi Məhkəməsində Elbəy Allahverdiyevin sədrliyi ilə keçmiş MTN-in yüksək vəzifəli zabitlərinin, o cümlədən Antiterror Mərkəzinin rəisi Elçin Quliyevin, polkovnik Azər Mehdiyevin və digərlərinin işi üzrə proses davam edib.

Bu gün məhkəmədə zərərçəkmişlər mülki iddia ilə çıxış ediblər.

Bir neçə nəfər bildirib ki, müttəhimlər onlardan böyük məbləğdə pul tələb ediblər və onlara ciddi maddi ziyan vurublar.

Belə ki, Taleh Sadıxov 500 min manat, Aydın Cəfərov 90 min manat, Mətləb Mustafayev 120 min manat, Heydər Ələkbərov 500 min manat təzminat tələb ediblər.

Daha sonra müttəhim Elçin Quliyev prosesi qapalı keçirməyi təklif edib, bunu dövlət sirri faktları ilə izah edib. Hakim prosesin qismən qapalı keçirilməsinə razılaşıb.

Daha sonra prokuror ittiham aktını oxuyub, amma müttəhimlər özlərini təqsirli bilməyiblər, Quliyev və digərləri isə ifadə verməkdən imtina ediblər. Daha sonra çoxsaylı zərərçəkmişlərdən ikisi ifadə verib. Növbəti məhkəmə iclası mayın 8-nə təyin edilib.

Elçin Quliyev və onun tabeliyində olan şəxslər CM-in 12 maddəsi üzrə ittiham olunurlar, onlar arasında qanunsuz həbsləri, başqasının əmlakının talan edilməsi və ələ keçirilməsi, mütəşəkkil qrup tərkibində zorla pul tələb etmə, səlahiyyətlərdən sui-istifadə, böyük rüşvətlərin alınması və s. var.

Xatırladaq ki, Quliyev və onun tabeliyində olan şəxslər sahibkarları qanunsuz olaraq izləyir, onları həbs edir, qətl və həbslə hədələyərək pul tələb edirdilər. Bu cür əməllərdən ümumilikdə onlarla sahibkar zərər çəkib. Onlara dəyən ziyanın və ələ keçirilmiş əmlaklarının məbləği on milyonlarla ölçülür.

Xatırladaq ki, 2015-ci ilin oktyabrında MTN yenidən formalaşdırıldıqdan sonra 20-dən çox zabit həbs edilib və onlara qarşı çoxsaylı cinayət işləri açılıb.

Hazırki məhkəmə prosesi MTN işçilərinə qarşı sayca üçüncü prosesdir, digər iki proses də hələ davam edir. -16D-