Keçmiş pilot AZAL-ın təyyarəsində baş vermiş qəzanın mümkün səbəbləri barədə

Keçmiş hərbi pilot, ehtiyatda olan polkovnik-leytenat Mirzə Fərəcov AZAL-ın Bakı-Qroznı reysiə uçan təyyarəsində baş vermiş qəzanın mümkün səbəblərini Turan-a şərh edib.

"Təyyarə eniş üçün çox aşağı hündürlüyündə idi və sərt eniş etdi. Videodan görünür ki, təyyarə birbaşa çırpılıb yerə. Ola bilsin ki, hansısa mühərrikdə problem yarandı. Mən baxdım, təyyarə artıq təkərləri açmışdı. Deməli, enişə hazırlaşırdı. Nə baş verdisə həmin zaman baş verdi", - keçmiş pilot deyib.

Ancaq daha dəqiq təhlil etmək üçün hündürlüyü və hava limanına qalan məsafəni bilmək lazımdır.

"Çünki eniş etmək üçün təyyarənin olduğu hündürlük ən azı 500 metr olmalıdır”, - Fərəcov deyib. “Deyilənə görə, hadisəyə səbəb hava gəmisinin quş sürüsü ilə toqquşması olub. Ola bilsin quşlar mühərriyə girib, mühərrik də dayandı. Quşlar şüşəyə çırpıla bilər, amma o dərəcədə onu sındıra bilməz".

O hesab edir ki, dumanlı hava versiyası o qədər də inandırıcı görünmür: "Duman şəraiti var idisə, amma videodan görünür ki, heç olmasa aşağı 100 metr görünür. Bir var dumanın içi ilə gəlib görməsin və eniş etsin. Ancaq təyyarədə cihaz var və o dumanlı havada göstərir ki, hava limanına neçə kilometr qalıb", - Fərəcov deyib.