Komitə sədri idarələrin sahələrə döndəriləcəyini iddia edir

Abşeron, Sahil, Neft Daşları qazma işləri idarələri bağlanır və onların yerində sahə qazma işləri strukturları yaradılması nəzərdə tutulur. Bu haqda Turan-a Neftçilərin Hüquqlarını Müdafiə Komitəsinin sədri Mirvari Qəhrəmanlı bildirib.

Hüquq müdafiəçisi bu açıqlamanı aldığı məlumatlar əsasında verdiyini deyib.

O, bu idarələrin ləğvinin xeyli insanın ixtisara düşəcəyilə tamamlanacağını nəzərə çatdırıb. M.Qəhrəmanlı qazma işləri üzrə sahə strukturlarının sovet dönəmindən qalma idarəetmə strukturu olduğunu deyib. Sahələr azsaylı mobil qruplardan ibarət olur. Amma hüquq müdafiəçisi bu ləğvolunma zamanı peşəkarların işdən azad olunması, qeyi-peşəkarların, kiminsə kimin adamı olmasına görə işdə saxlanması kimi hallardan ehtiyat etdiyini dilə gətirib. 

M.Qəhrəmanlı aldığı məlumatlara əsasən, Bakı rayonlarının qaz idarələrini də yenidənqurma prosesi gözlədiyini söyləyib. Onun sözlərinə görə, rayonların qaz idarələri birləşdirilərək, əvəzində departamentlər yaradılması nəzərdə tutulur. 

Komitə sədri rayonlar üzrə qaz istismarının ciddi nəzarət altında olmasının vacibliyini vurğulayaraq, bu sahədə mövcud idarəetmənin səmərəli olduğunu deyib. Onun fikrincə, istər “Azəriqaz”, istər “Azərkimya”, istərsə də Təhlükəsizlik İdarəsi neft şirkəti təkibindən çıxarılaraq, müstəqil fəaliyyət göstərən biznes qurumlarına dönməlidir. O zaman neftçilərin maaşlarını 3-4 dəfə artırmaq olar. 

Dövlət Neft Şirkəti mənsubları idarələrin ləğvi və ixtisarlar barədə informasiyaya malik olmadıqlarını deyiblər. -05B-