Kürü dibi lazım olmayan yerlərdə dərinləşdirilir

FHN Kür çayının dibinin dərinləşdirilməsi üzrə işlərə başlayıb. Bu barədə Turan-a “Demokratiyaya yardım” regional QHT-nin rəhbəri Emil Məmmədov bildirib. Lakin onun sözlərinə görə, bu işlər Salyan rayonunda çayın  aşağı hissəsində, dibin onsuz da dərin olduğu yerdə aparılır.

Ələt-Astara yolundakı körpüdən işlərin aparıldığı yer yaxşı göründüyündən belə təəssürat yaranır ki, FHN sadəcə özünü reklam ilə məşğuldur.

E.Məmmədov hesab edir ki, daşqının qarşısının alınması üçün çayın bu hissəsində dibin dərinləşdirilməsi işlərinin əhəmiyyəti yoxdur. 

“Bu işləri dayaz yerlərdə aparmaq lazımdır, dərin olan yerlərdə yox”, - E.Məmmədov vurğulayıb.

Bu cür  tədbirlər 2010-cu il yazında baş vermiş daşqınların təkrarlanmasının qarşısının alınması üzrə işlər çərçivəsində aparılır. Daşqın zamanı ölkənin 8 aran rayonunu su basmışdı. Bunun səbəblərindən biri çayın məcrasının və Xəzərə tökülən yerdə mənsəbinin dərinliyinin az olması idi. -06V-