Kürün suları altında qalmış Sabirabad rayonunun aldadılmış sakinləri növbəti dəfə FHN-də olublar

Sabirabad rayonunun 2010-cu il daşqınından ziyan çəkmiş təsərrüfatlara görə kompensasiya ödənilməsində ədalətsizlikdən qəzəblənmiş 100-ə yaxın sakini cümə günü Fövqəladə Hallar Nazirliyinə gəliblər.

    Əsgərbəyli, Qasımbəyli, Azadkənd və digər kəndlərin sakinləri hakimiyyətin iki ildir onlara qarşı səhlənkar münasibətindən narazılıqlarını ifadə ediblər. Belə ki, yerli sakinlərin bir hissəsi üçün evlər tikilib, lakin bu evlər qışda yaşamaq üçün yararlı deyil. Bundan başqa, yollar, xəstəxanalar, məktəblər, su kəmərləri bərpa edilməyib. İnsanların avtobus nəqliyyatına, uşaq bağçalarına böyük ehtiyacı var. Fermerlərə kənd təsərrüfatı texnikası, əkin materialı, gübrə, kredit və s. lazımdır. Amma hər şeydən çox onlar pul kompensasiyasının ədalətli ödənilməsini istəyirlər.

    Əsgərbəyli kənd sakini Siyavuş Əflatunovun sözlərinə görə, FHN-in qəbul otağında onları dinləyiblər və növbəti dəfə məsələni araşdıracaqlarına söz veriblər. “Lakin biz onların vədlərinə inanmırıq. Keçən dəfə də bizi dinlədilər, növbəti gün isə yerli hüquq müdafiəçisi İlham Əmiraslanovu həbs etdilər.

    Hökumətin qərarına əsasən, 200 manat birdəfəlik yardım verilməli və mal-qara itkisi, həyətyanı sahənin çirklənməsi ilə əlaqədar kompensasiya verilməli idi. Hökumət ümumilikdə 350 mln. manat ayırıb. Bu vəsaitlə bütün məsələləri həll etmək olardı, lakin bu, baş vermədi, deyə Əflatunov bildirib.

    Proqramda nəzərdə tutulmuş 3,5 min evdən 1 mindən bir qədər çox qüsurlu ev istismara verilib. Yeni evlərin həyətyanı sahələri cəmi 6 sotdur.

    Bundan başqa, evlərdə isitmə sistemi, qaz, sanitar qovşaq yoxdur, su çəkilməyib. Evlər ucuz işçi qüvvə cəlb edilməklə aşağı keyfiyyətli materialdan tikilib.

    Kənd fəalının fikrincə, tikintinin dəyəri 4 dəfə yüksək göstərilib. Ayrılmış vəsait məmurların istəyinə görə paylaşdırılır, insanların maraqları nəzərə alınmır. 

    Sabirabad sakinləri FHN-dən Prezident Administrasiyasına yönəliblər.

    İnsanlar deyirlər ki, iki ildir kabinet-kabinet gəzmək və hakimiyyətin etinasızlığı onların ədalətə olan inamını itirib. Onlar beynəlxalq ictimaiyyətə və insan hüquqları üzrə beynəlxalq məhkəmələrə ümid edirlər. -17D-