Lapşin üzr istəyib?

Bakının tələbilə Minskdə saxlanılan bloger Aleksandr Lapşin yazılı formada Azərbaycan prezidentindən üzr istəyib, ancaq Dağlıq Qarabağa getdiyinə görə yox, onu təhqir etdiyinə görə. Bu barədə Lapşinin müdafiəsi üzrə qrupun rəhbəri vəkil Ara Kazaryan bildirib.

“Əslində o, Əliyevə müraciət edib, onu təhqir etdiyinə görə üzr istəyib. Məktubda Ermənistan və Dağlıq Qarabağın adı çəkilmir”, - RİA-Novosti Kazaryandan sitat gətirib.

İsrailin Belarusdakı konsulu Yuliya Raçinski-Spivakova bundan öncə bildirib ki, onun iştirakı ilə Lapşin “Azərbaycan prezidentinin adına məktub yazıb və öz hərəkətinə görə üzr istəyib”. Konsul qeyd edib ki, İsrail diplomatik missiyası Rusiya səfirliyi ilə fəaliyyətini koordinasiya edir. Çünki Lapşin həm də Rusiya vətəndaşıdır. Konsulun sözlərinə görə, İsrailin rəsmi mövqeyi belədir: “Biz blogerin ekstradisiyasının əleyhinəyik, hesab edirik ki, o azad edilməlidir”.

Rəsmi Bakı hələlik Lapşinin üzrxahlıq məktubu yazması faktını şərh etmir.

Xatırladaq ki, yanvarın 17-də Belarus Baş Prokurorluğu Lapşinin Azərbaycana ekstradisiyası barədə qərar qəbul edib.

2016-cı il dekabrın ortalarında Rusiya və İsrail vətəndaşı olan Lapşin Azərbaycanın sorğusuna əsasən sərhəddi qanunsuz keçdiyinə, eləcə də Azərbaycanın ərazi bütövlüyünə qarşı çağırışlara görə Minskdə saxlanılıb.

Bundan əlavə, 2015-ci ildə Lapşin  Ukrayna vətəndaşına məxsus saxta pasport ilə Gürcüstan vasitəsilə Azərbaycana gəlib.-02D-