![А.Лапшин](https://turan.az/resized/media/2017/main/071200003067-750-500-resize.webp)
А.Лапшин
Lapşinin işi üzrə məhkəmə prosesi yekunlaşır
Bakı/11.07.17/Turan: Çərşənbə günü bloger Aleksandr Lapşinin işi üzrə məhkəmə prosesində Ədliyyə Nazirliyinin Məhkəmə Ekspertizası Mərkəzinin eksperti Almaz Bayramovanın çıxışından sonra istintaqın yekunlaşdığı elan olunub.
Bayramova müttəhimin vəkili Eduard Çerninin vəkaləti əsasında dindirilib.
O, Lapşinin nəşrlərində Azərbaycanın ərazi bütövlüyünə qarşı çağırışlar olduğu haqqında ekspert rəyi vermişdi.
Vəkil bu çağırışın konkret olaraq hansı ifadələrdə yer aldığını soruşub, buna cavabda ekspert deyib ki, Lapşinin "Ermənistan harada, Qarabağ orada" ifadəsində.
Vəkil başqa hansı ifadələrdə ərazi bütövlüyünə qarşı çağırış olduğunu soruşub. Ekspert cavab verib ki, Lapşin Dağlıq Qarabağı "Arsax" kimi təqdim edib, onun nəşrlərində region Ermənistan torpaqları kimi təqdim edilib.
O, həmçinin Lapşinin Azərbaycan XİN-in işğal edilmiş ərazilərə qanunsuz səfər edən şəxslərin adlarının salındığı "qara siyahısı"nı ələ saldığını və dəfələrlə bu ərazilərə səfər edə biləcəyi haqqında bəyanatını qeyd edib.
Lapşin özü deyib ki, "Arsax" terminindən regionun erməni dilindəki adı kimi istifadə edib. Bundan başqa, "Ermənistan harada, Qarabağ orada" ifadəsində Qarabağın Ermənistanla coğrafi qonşuluğunu nəzərdə tutub.
Lapşin həmçinin qeyd edib ki, Dağlıq Qarabağın Ermənistan ərazisi olduğunu deməyib.
Daha sonra vəkil 10 şahidin - məcburi köçkünlərin ifadələrinin iş materiallarından çıxarılması barədə vəsatət qaldırıb. Çernin xatırladıb ki, şahidlər Qarabağ münaqişəsinin nəticələri haqqında danışıblar.
"Şahidlər bizi ortaq acımız haqqında danışıblar, amma onların ifadəsi ona qarşı irəli sürülmüş ittihamların mahiyyəti ilə bağlı deyildi", deyə vəkil bildirib.
O qeyd edib ki, Azərbaycan CPM-ə əsasən, hər-hansı cinayətin şahidi olan şəxslər şahid qismində dindirilə bilər. Vəkil bu şahidlərin ifadələrinin dəlillər siyahısından çıxarılması barədə vəsatət qaldırıb.
Amma prokuror Nəsir Bayramov etiraz edib, müdafiə tərəfin bu məsələ ilə bağlı hazırlıq iclasında fikir bildirməli olduğunu qeyd edib.
Hakim Əlövsət Abbasov vəsatəti təmin etməkdən imtina edib, dəlillərin yekun qərar hazırlanarkən qiymətləndirildiyini bildirib. Bundan sonra hakim məhkəmə istintaqının başa çatdığını bildirib.
Dövlət ittihamçısı yekun nitqə hazırlaşmaq üçün vaxt istəyib və iclas iyulun 14-ü saat 14-ə təyin edilib.
Vəkil Çernin məhkəmənin yekunlarını Turan-ın müxbirinə şərh edərkən deyibki, müdafiə tərəfi Lapşinin təqsirinin sübuta yetirilmədiyini hesab edir.
"Şahidlər Qarabağ münaqişəsi haqqında danışıblar və bu, hər bir Azərbaycan vətəndaşına aiddir və müəyyən dərəcədə hər birimiz zərərçəkmiş sayılırıq. Amma şahidlərin ifadələrinin konkret olaraq Lapşinə qarşı irəli sürülmüş ittihamlarla əlaqəsi yox idi", deyə vəkil bildirib.
Onun fikrincə, ekspert Lapşinin ərazi bütövlüyünə qarşı çağırışlarının nədən ibarət olduğunu açıqlamayıb.
Lapşin özü qeyd edib ki, Dağlıq Qarabağa turist kimi gedib və Azərbaycanlıların əleyhinə deyil və Azərbaycanın ərazi bütövlüyünə hörmət edir. -06D-
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz