Leyla və Arif Yunuslar Niderlanda gediblər

Hüquq müdafiəçiləri Arif və Leyla Yunuslar  aprelin 19-da səhər tezdən Niderlanda gediblər. “Hazırda onlar qızları Dinara ilə bir yerdədir. İnsan haqları uğrunda uzun və çətin mübarizədən sonra burada dincələcəklər”, - Hollandiyanın xarici işlər naziri Bert Kunders bildirib.

Onun sözlərinə görə, Yunuslar ailəsi beynəlxalq birliyin dəstəyini “haqq edir”. “Leyla və Arif öz təhlükəsizliyini və rifahını risk altına qoyaraq demokratiya və insan haqları uğrunda mübarizə aparıblar. Onlar Azərbaycanda vəziyyətin yaxşılaşdırılması üçün mübarizə aparıblar. Onlar öz ölkələrində miskin həyat sürüblər. Yaxşı ki, Azərbaycanda insan hüquqları uğrunda uzun mübarizədən sonra indi dincələ biləcəklər”, - o vurğulayıb.

Aİ və digər ölkələr kimi Niderland da Yunusların azad edilməsi üçün səy göstərib.

"Yunuslar ailəsinin taleyi göstərir ki, ədalətə nail olmaq üçün beynəlxalq birlik təzyiq etməlidir. Sakit diplomatiya sözsüz ki, nəticə verir”, - Kunder qeyd edib və Azərbaycanın qərarını müsbət humanitar jest adlandırıb.

O ümid edir ki, bu, Azərbaycanda insan hüquqlarının vəziyyətinin yaxşılaşmasının göstəricisidir. “Biz Azərbaycanı bu prosesi davam etdirməyə çağıracağıq”, - o vurğulayıb.

Xatırladaq ki, 60 yaşlı Leyla və Arif Yunuslar ciddi xəstəliklərdən əziyyət çəkirlər və həbs müddətində bu xəstəliklər kəskinləşib. Uzun müddət hakimiyyət onların barəsində cinayət işinin olduğunu əsas gətirərək onları xaricə buraxmaqdan imtina edirdi. İki il həbsdə olan Arif və Leyla Yunuslar şərti olaraq azadlığa buraxılıb.-16D-