Lotu Qulinin adamları silahlı qarət törədiblər?

Tbilisi/02.12.17/Turan: Terjolsk bələdiyyəsinin Broliskedi kəndində qarətdə ittiham olunan cinayətkar qrupun iki üzvü saxlanılıb. Bu barədə Gürcüstan DİN-in mətbuat xidmətinin məlumatında deyilir. Onların hər ikisi Azərbaycan vətəndaşıdır: 29 yaşlı R.A və 44 yaşlı X.A.

İstintaqın məlumatına görə, beş nəfərdən ibarət qrup dekabrın 1-də iki vətəndaşa hücum edib. İnsident Xaraqaul rayonunun Sakasriya kəndində baş verib. Həmin vaxt BMW markalı avtomobildə xəsarət alanlar Tbilisidən Batumiyə gedirmişlər.

Cinayətkar qrupun üzvləri odlu silahla silahlanıblar. Onlar hədə-qorxu gələrək zərərçəkənlərin 140 min dollarını, mobil telefonlarını və şəxsi əşyalarını alıblar, sonra hadisə yerindən qaçıblar.

İki nəfər "isti izlər"lə saxlanılıb. Polislər oğurlanan pulun bir hissəsini- 90 min dolları götürüblər.

Gürcüstan DİN əməkdaşlarının apardıqları əməliyyat-axtarış tədbirləri zamanı mütəşəkkil qrupun üzvlərinin şəxsiyyətini müəyyən etmək mümkün olub.

Onların arasında üç nəfər Gürcüstan vətəndaşı var, ikisi kriminal avtoritet, "qanuni oğru"dur. DİN-in məlumatına görə, onlardan biri kriminal dairələrdə "Quli" ləqəbi ilə tanınır. Hüquq-mühafizə orqanları cinayətkar qrupun digər üzvlərinin yerini müəyyən etmək üçün işi davam etdirirlər.

Baş verənlərlə bağlı Gürcüstan CM-in 179-cu maddəsinin ikinci hissəsinin "b" bəndi, həmçinin 179-cu maddənin üçüncü hissəsinin "q" bəndi (bir qrup şəxs tərəfindən külli miqdarda qarət) ilə istintaq başlayıb. Saxlanılanları 7 ildən 12 ilədək həbs cəzası gözləyir.

Xatırladaq ki, bu yaxınlarda Bakıda həbsdən azad edilmiş Lotu Quli (Nadir Səlifov, əslən gürcüstanlıdır) çox güman ki, həmin kriminal avtoritetdir. Qeyri-rəsmi məlumatlara görə, o, Azərbaycanı tərk edib və Türkiyədə yaşayır.02D-