Mayın 14-də Anar Məmmədli və bu iş üzrə digər təqsirləndirilənlər məhkəmədə ifadə verəcəklər

Bakı Ağır Cinayətlər Məhkəməsində Rauf Əliyevin sədrliyi ilə Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin, bu QHT-nin icraçı direktoru Bəşir Süleymanlı və Könüllülərin Beynəlxalq Əməkdaşlığı İctimai Birliyinin rəhbəri Elnur Məmmədovun işi üzrə proses davam edib.

Onlar CM-in 5 maddəsi ilə – vergidən yayınma, qanunsuz sahibkarlıq, vəzifə səlahiyyətlərindən sui-istifadə, iri məbləğdə əmlakın mənimsənilməsi və vəzifə saxtakarlığı ittiham olunurlar.

Vəkil İradə Cavadovanın Turan-a verdiyi məlumata görə, bugünki iclasda müdafiə tərəfinin verdiyi vəsatətlər əsasında əlavə şahidlər dindirilib.

Belə ki, Ədliyə Nazirliyinin nəzdində fəaliyyət göstərən Məhkəmə Ekspertizasının mühasibatlıq üzrə ibtidai istintaq zamanı yoxlama aktları əsasında rəy vermiş eksperti ifadə verib.

Vəkil hesab edir ki, ibtidai istintaq ekperti yalnış istiqamətə yönəldib.

Digər şahidlər isə öz ifadələrində bildiriblər ki, SMDT və Könüllülərin Beynəlxalq Əməkdaşlığı İctimai Birliyinin layihələrində iştirak ediblər və xidmət haqlarını vaxtlı-vaxtında alıblar. Təqsirləndirilənlərə qarşı heç bir iradları yoxdur.

Qeyd edək ki, mayın 12-də prosesdə Vergilər və Maliyyə nazirliklərinin sözügedən QHT-lərin layihələrinin fəaliyyətini yoxlayan əməkdaşları dindirilib. Lakin təqsirləndirilən şəxslərin və vəkillərin suallarını cavablandırarkən onlar təqsirləndirilən şəxslərin nədə ittiham olunduğunu izah edə bilməyiblər.

Mayın 14-də iclasda təqsirləndirilən şəxslərin ifadə verəcəyi gözlənilir.

Amnesty İnternational Anar Məmmədlini “vicdan məhbusu” kimi tanıyıb. -16D-