McDonalds-Azərbaycan şirkətinin rəhbəri prezident İlham Əliyevə müraciət edib

Bakı Apellyasiya Məhkəməsi ədalət mühakiməsini bir məmurun sifarişinə qurban verib. Yol qəzasında həlak olmuş Sənan Mirzəyevin atası Maqsud Mirzəyev  belə hesab edir.

M.Mirzəyev McDonalds-Azərbaycan şirkətinin icraçı direktorudur. O, yol qəzasında günahkarın – Səbayel Rayon İcra Hakimiyyətinin başçısı Arif Əsgərovun oğlu İlham Əsgərovun cəzasının əsassız olaraq “yumşaldılması” ilə bağlı prezident İlham Əliyevə  müraciət  edib.

Xatırladaq ki, S.Mirzəyev   2014-cü il sentyabrın 27-də yol qəzsında həlak olub. Bakının Türkan-Zığ yolunda sürücülük hüququ olmayan  Ilham Əsgərov yüksək surətlə idarə etdiyi Mercedes markalı avtomobili  Əhliman Süleymanovun idarə etdiyi  “HOWO” özüboşaldan yük avtomobilinə çırpıb. Mercedes-də olan  S.Mirzəyev xəstəxanada ölüb,  Pərvin Abdullayev (o, avtomobili İlhama verib) və İ.Əsgərov yaralanıblar.

Bakı Ağır Cinayətlər Məhkəməsinin 12 may 2015-ci il tarixli hökmü ilə yol-nəqliyyat hadisəsinin əsas səbəbkarı  İ.Əsgərov CM-nin 263-1.3-cü maddəsi ilə təqsirli bilinərək 5 il 6 ay müddətinə, Ə. Suleymanov CM-nin 263.2-ci maddəsi ilə təqsirli bilinərək 6 il müddətinə azadlıqdan məhrum edilib.

İyunun 29-da Vaqif Mursaquolvun sədrliyi ilə Apellyasiya Məhkəməsi İ.Əsgərovun cəza müddətini 3 ilədək azaldıb.

M.Mirzəyev hesab edir ki, Apellyasiya Məhkəməsinin qərarı ədalətə olan inamı pozur, hamının qanun qarşısında bərabər olması prinsipini şübhə altına alır.

Onun fikrincə, Səbayel Rayon İcra Hakimiyyətinin başçısı A.Əsgərov öz xidməti vəzifəsindən istifadə edərək oğlunun cəzasının yüngülləşdirilməsinə çalışıb.

Hazırda İ.Əsgərov Ədliyyə Nazirliyinin  Penitensiar Xidmətinin Müalicə Müəssissinə yerləşdirilib ki, cəza cəkməkdən də azad olsun.

M.Mirzəyev prezidentdən     xahiş edir ki, Konstitusiyanın təminatçısı kimi bu işi öz nəzarətinə götürsün və faciə günahkarının cəzadan yaxa qurtarmasına yol verməsin.  –06D—