Mədən Sənayesində Şəffaflığın Artırılması Koalisiyası Qubad İbadoğlunun azad edilməsini tələb edir

Bakı/26.07.23/Turan:  Mədən Sənayesində Şəffaflığın Artırılması Koalisiyası tanınmış iqtisadçı alim Qubad İbadoğlunun həbsi ilə bağlı bəyanat verib.

Bəyanatda bildirilir ki, iyulun 23-də tanınmış iqtisadçı alim, Mədən Sənayesində Şəffaflığın Artırılması Koalisiyasının üzvü, ADR hərəkatının sədri Qubad İbadoğlu Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları  tərəfindən xüsusi zorakılıqla və əmlakına zərər vurmaqla saxlanılıb və həmin gün gecə saatlarında Qubad İbadoğlunun ofisində  axtarış aparılıb.

Qubad İbadoğlu və polis tərəfindən saxlanılarkən onunla birlikdə olan və 7 saat müddətində BMCMİ-də saxlanılan həyat yoldaşı polis tərəfindən xüsusi amansız zorakılığa və qeyri-insani rəftara məruz qalmış, müxtəlif dərəcəli bədən xəsarəti və psixoloji travma almışdır. Hakimiyyət bununla Azərbaycanaın da qoşulduğu Avropa İnsan Haqları Konvensiyasının 3-cü maddəsinin tələblərini (Heç kəs işgəncəyə, qeyri-insani və ya ləyaqəti alçaldan rəftara və ya cəzaya məruz qalmamalıdır) kobud şəkildə pozmuşdur.

Verilən ilkin rəsmi məlumatlara əsasən axtarış zamanı zəruri əhəməiyyət kəsb edən  müəyyən sənədlər  və  40 min dollar  pul tapılıb. Digər rəsmi məlumatlardan o da məlum olur ki, Qubad İbadoğluna  qarşı cinayət məcəlləsinin 204.3.1-ci maddəsi ilə ittiham irəli sürülüb. İttiham aktında iqtisadçı alim  külli miqdarda saxta pul və ya qiymətli kağızlar hazırlama, əldə etmə və ya satma əməllərində təqsirləndirilir.  İyul ayının 24-də isə Nərimanov rayon Məhkəməsinin qərarı ilə Qubad İbadoğlu barəsində 3 ay 26 gün müddətində həbs qət-imkan tədbiri seçilib. Hal-hazırda Qubad İbadoğlunun yaşadığı mənzilində və bağ evində BMCMİ-nin əməkdaşları tərəfindən axtarış aparılmaqdadır.

İctimai Birliklərin Mədən Sənayesində Şəffaflığın Artırılması Koalisiyası olaraq hesab edirik ki, Qubad İbadoğluna qarşı irəli sürülən bu ittihamlar əsassız və qərəzlidir, onun  həbsi  uzun illər ərzində hakimiyyətin dərin korrupsiyaya uğramış idarəetməsini, sosial-iqtisadi siyasətini tənqid edən mövqeyi, ictimai-siyasi fəaliyyəti ilə birbaşa bağlıdır.

Qubad İbadoğlu ölkənin tanınmış ictimai-siyasi xadimlərindən biri olaraq, dünyada ölkəmizi layiqincə təmsil edən iqtisadiyyat üzrə alimdir. O, London İqtisadiyyat Məktəbi (LSE), ABŞ-ın Duke və Ratqers (Rutgers)  kimi dünyanın nüfuzlu  universtetlərinin professoru olmaqla yanaşı, şəffaflıq üzrə ekspert alim qismində MHŞT kimi dünyanın nüfuzlu təşkilatının Beynəlxalq İdarə Heyətinin üzvü olaraq uzun illər ölkəmizi ləyaqətlə təmsil edib. 

Bütün bunları nəzərə alaraq, İctimai Birliklərin Mədən Sənayesində Şəffaflığın Artırılması Koalisiyası olaraq  tanınmış ictimai-siyasi xadim, iqtisadiyyat üzrə alim, professor Qubad İbadoğlunun həbsini pisləyir və dərhal azad olunmasını tələb edirik.