Media-icmal 05.04.2017

Azərbaycan-Qazaxıstan münasibətlərinin dəyərləndirilməsi, vətəndaşların  ölkədən çıxışlarına qadağalar, məhkəmə sisteminin durumu, bazarlardakı bahalıq bugünkü medianın aparıcı mövzusudur.

Dövlətlərarası uğurlu inkişaf nümunəsi         

“Azərbaycan” qəzeti “N.Nazarbayev: “Qazaxıstan hər zaman İlham Əliyevin yanında olacaq”  sərlövhəli məqalədə Azərbaycan-Qazaxıstan (http://www.azerbaijan-news.az/index.php?mod=3&id=119211) münasibətlərini dəyərləndirir.

Müəllif bu dəyərləndirməni Qazaxıstan prezidenti Nursultan Nazarbayevin Azərbaycana  yenicə başa çatmış səfəri fonunda edir.

Müəllif  tarixi-etnik köklərlə, eyni dil qrupu, ənənə və dəyərlərlə bir-birinə yaxın olan xalqların həmrəyliyini son dərəcə vacib sayır və bu mənada prezident İlham Əliyevin türkdilli dövlətlərlə əlaqələrin dərinləşdirilməsinə önəm verdiyini vurğulayır: “Son 14 ildə ölkə başçısı Orta Asiyanın türkdilli dövlətləri ilə münasibətləri gücləndirmək xəttinə üstünlük verib. Azərbaycanın Qazaxıstanla münasibətlərinin ildən-ilə inkişaf etməsi də deyilənlərə əyani misal ola bilər”.

Müəllif iki ölkə arasında əlaqələrin bütün sahələr üzrə uğurla inkişaf etdiyini deyir, iki dövlət arasında ən müxtəlif sahələrə dair imzalanmış mühüm sazişlərin əməkdaşlığın dinamizminə xidmət etdiyini vurğulayır: “Ölkələrimiz və xalqlarımız arasında siyasi, iqtisadi, humanitar sahələrdə əldə olunan ciddi uğurlar dövlətlərarası inkişafda öz sözünü deyir”.

Daha sonra müəllif diqqəti Qazaxıstan prezidentinin Azərbaycana son səfərinə yönəldir və bu səfər zamanı iki ölkə arasında əlaqələrin daha da inkişaf etdirilməsi xəttinin üstünlük təşkil etdiyini, bir sıra sənədlərin imzalanmasını nəzərə çatdırır.

Müəllif bu səfərin mahiyyətini dövlət başçısı İlham Əliyevdən sitat gətirərək daha da qüvvətləndirir: “Bizim ölkələrimiz arasında ikitərəfli münasibətlərin möhkəm təməli var. Bu il biz dövlətlərimiz arasında diplomatik münasibətlər qurulmasının 25 illiyini qeyd edirik, hərçənd ki, xalqlarımızın qarşılıqlı münasibətlərinin tarixi 100 illiklərlə hesablanır”.

Məqalədə deyilir ki, Qazaxıstan prezidenti N.Nazarbayev çıxışında ölkəsinin daim Azərbaycanın yanında olacağını vurğulayıb.

Müəllif deyir ki, bu səfər bir daha Azərbaycan-Qazaxıstan münasibətlərinin bütün sahələr üzrə inkişafının təsdiqi göstəricisidir.

Bir qanun, yüz qanunsuzluq

“Exo” qəzeti “Hansı halda Azərbaycandan xaricə çıxmağa icazə vermirlər?” (http://ru.echo.az/?p=58210) sərlövhəli məqalədə vətəndaşın ölkədən çıxışına qadağa qoyulması hallarını ekspert Əkrəm Həsənovla müzakirə edir.

Müəllif maliyyə borcu məsələsini gündəmə gətirir və bu borc ödənilməyənə kimi vətəndaşın ölkədən çıxışına yasaq tətbiq edildiyini bildirir.  

Müəllif xatırladır ki, bu yaxınlarda Vergilər Nazirliyi vergi borcları olan fiziki və vəzifəli hüquqi şəxslərin ölkədən çıxışını qadağan edib: “Nazirlikdən bildiriblər ki, xaricə çıxış qadağası borc tam ödənildikdən sonra qaldırıla bilər”.

“Ölkədə elə bir qanun yoxdur ki, vətəndaşa kredit və ya maliyyə təşkilatına olan borcuna  görə xaricə çıxmağı qadağan etsin”. Bunu isə qəzetə bank məsələləri üzrə ekspert Əkrəm Həsənov bildirib.

Onu  sözlərinə görə, borclunun xaricə çıxışına yasaq ancaq bir halda mümkündür ki, konkret şəxsə qarşı məhkəmə qərarı olmuş olsun: “Məhkəmə qərarı var, amma borclu bocrunu imkanı olduğu və üzrsüz olaraq ödəmir, yalnız bu halda xaricə çıxışa qadağa qoyula bilər, qalan bütün hallarda xaricə çıxış yasağı  qoyulması qanunsuzluqdur”.

Ə.Həsənov vurğulayır ki, əvvəllər bu yasaqlama tez-tez baş verirdi, amma son zamanlar azalıb.

Ekspert Samir Əliyev isə hesab edir ki, ölkənin indiki mürəkkəb maliyyə durumunda dövlət vətəndaşa tərəf addım atmalıdır.

S.Əliyev deyir ki, Azərbaycanda borclunu məhkəməyə vermək üçün borcun hansı məbləğdə olması normativi hələ müəyyən edilməyib, ona görə də borc verənlər az borcu olanı da, çox borcu olanı da məhkəməyə verirlər.