Media-icmal 07.12.18

Azərbaycanda iqtisadiyyatın sabit inkişaf etməsi, maliyyə naziri Samir Şərifovun manatla bağlı açıqlamasına baxış, Yeni il şənliklərilə bağlı restoran-əyləncə mərkəzlərində qiymətlər və s. məsələlər bugünki (07 dekabr 2018-ci il)

medianın aparıcı mövzularındandır...

Cənubi Qafqazın iqtisadi mərkəzi

"Azərbaycan" qəzeti "250 milyard dollar sərmayə, 45 milyard dollar valyuta ehtiyatı" sərlövhəli məqalədə ölkə iqtisadiyyatnın sabit şəkildə inkişafını dəyərləndirir.

Müəllif fikrini əsaslandırmaq üçün dövlət başçısı İlham Əliyevin bu günlərdə Rusiyanın "Rossiya-24" telekanalına müsahibəsindən sitat gətirir: "Dünyada neftin qiymətinin artıb-azalmasından asılı olmayaraq, Azərbaycan iqtisadiyyatının davamlı tərəqqisi üçün qeyri-neft sektorunun inkişafı bizim uğurla həll etdiyimiz əsas vəzifəmizdir. Buna görə də biznesə yaxşı şəraitin yaradılması məqsədilə infrastruktur layihələrinin inkişafı üçün çox iş görülür. Biznesin həvəsləndirilməsi, sahibkarlara köməklə bağlı xeyli layihələr var. Bütövlükdə investisiya, biznes mühiti Azərbaycanda yaxşılaşır...".

Müəllif deyir ki, son illərdə Azərbaycanda biznes və investisiya mühitinin daha da yaxşılaşdırılması istiqamətində ciddi addımlar atılır, son 15 ildə ölkənin valyuta ehtiyatlarını 28 dəfə artıraraq 45 milyard dollara yüksəltməsi, iqtisadiyyata 250 milyard dollar investisiya yatırılması bunu təsdiq edən ən vacib faktlardır.

Müəllifə görə, bu, həm də Azərbaycanın regionda ən güclü iqtisadi potensiala malik olan ölkəyə çevrilməsinin sübutudur.

Məqalə müəllifi hesab edir ki, son illərdə biznes sahəsində vəziyyətin daha da yaxşılaşdırılması, ölkədəki sabitlik Azərbaycana investisiya axınını gücləndirib və sərmayələr əsasən İtaliya, Almaniya, Böyük Britaniya, ABŞ, Yaponiya, Rusiya Federasiyası, Türkiyə və s. kimi inkişaf etmiş ölkələrdən gəlir.

Müəllifin sözlərinə görə, Azərbaycanın 51 ölkə ilə ikiqat vergitutma sahəsində sazişlər, 47 ölkə ilə ikitərəfli investisiya müqavilələri imzalaması, xarici investisiyanın qorunması, vergi cinayətlərinə görə qanunvericiliyin gücləndirilməsi də bu sahədə sözünü deyir.

Yazı müəllifi deyir ki, 2017-ci ildə Azərbaycan iqtisadiyyatına 14,6 milyard dollar investisiya yatırılması ölkənin yerli və xarici investorlar üçün cəlbedici məkan olmasının göstəricisidir.

2019-cu il üçün iqtisadiyyatın yaxın perspektivdə inkişafı ilə bağlı müəllif deyir ki, gələn il üçün dövlət investisiya proqramı 6 milyard 825 milyon 300 min manat həcmində qiymətləndirilir, bu vəsaitin 5 milyard 129 milyon 600 min manatı əsaslı vəsait qoyuluşu hesabına, qalanı isə xarici kreditlər hesabına cəlb ediləcək, gələn il infrastruktur layihələrinə 4 milyard 960 milyon 674,6 min manat yönəldiləcək.

Müəllif deyir ki, Azərbaycan təkcə investisiyalar cəlb etmir, həm də böyük sərmayəçi kimi çıxış edir, belə ki, TANAP, TAP, "Cənub qaz dəhlizi" kimi beynəlxalq eneri layihələri bunun təsdiqidir.

Məqalə müəllifi regionda ÜDM payına, investisiya, tranzit, əverişli biznes mühitinə görə Azərbaycanı Cənubi Qafqazın iqtisadi mərkəzi adlandırır.

Deputat: Əgər bu proses var idisə...

Ölkə.az saytında isə "Azərbaycanda devalvasiya üçün heç bir zəmin yoxdur" sərlövhəli məqalə diqqət çəkir.

Müəllif maliyyə naziri Samir Şərifovun bu günlərdə "manatın məzənnəsinin kəskin möhkəmlənməsi ixraca da mənfi təsir edir. Bu, xaricdən idxalın artmasına səbəb olur. Ona görə də, biz bir sıra məsələlərin həllinə çalışmalıyıq" kimi bəyanatının ictimaiyyət tərəfindən birmənalı qarşılanmadığını deyir.

Deputat Vahid Əhmədov isə "ölkə.az"a açqlamasında buna münasibət ifadə edərək maliyyə nazirinin sözügedən çıxışının başadüşülməz olduğunu söyləyib:

"Bu gün həm əhali, həm də sahibkarlar üçün dayanıqlı manatın olması lazımdır ki, hər hansı ciddi problem yaranmasın. 2015-ci il devalvasiyası çoxlarının yadına gəlir. Həmin devalvasiyadan nə qədər insanlar əziyyət çəkdi, əhalinin nə qədər milli valyutası dəyərdən düşdü, banklarda olan əmanətlər dəyərini itirdi, bankların vəziyyəti ağırlaşdı, buna görə əhali ilə banklar arasında problemlər yaşandı və s.".

V.Əhmədov hesab edir ki, hazırda manatın dəyərdən düşməsi üçün heç bir əsas yoxdur.

Deputat fikrini belə səaslandırır ki, hazırda dünyada neftin qiyməti 60 dollardan yuxarıdır, Azərbaycanın idxal-ixrac əməliyyatlarında müsbət saldo var və Mərkəzi Bank tərəfindən pul kütləsinə çox ciddi nəzarət olunur: "Ona görə də hesab edirəm ki, sadaladığım bu üç əsas amil Azərbaycanın xeyrinə olduğu üçün indiki şəraitdə manatın devalvasiyasından söhbət gedə bilməz".

Dövlətin 45 milyrad dollardan çox valyuta ehtiyatı olduğunu deyən V.Əhmədov hesab edir ki, ölkədə aparılan iqtisadi siyasətə görə Azərbaycanda heç bir devalvasiya gözlənilmir və yaxın vaxtlarda bunun şahidi olmayacağıq.

Deputat nazirin bu açıqlamasına qarşı olduğunu deyərək, nazirin buna aydınlıq gətirməsini istəyir: "Şəxsən mən nazir Samir Şərifovun dedikləri ilə qətiyyən razı deyiləm. Əgər doğrudan da belə bir proses var idisə, o zaman Milli Məclisdə Dövlət Büdcəsi məsələsi müzakirə olunan zaman bu, açıqlanmalı idi. Biz 15 günə yaxın müzakirələr apardıq və manatın dayanıqlığını təsdiq etdik. Bəs belə söhbət var idisə, nə üçün nazir bunu açıqlamırdı?"

V.Əhmədov hesab edir ki, bu gün dayanıqlı manat ölkəyə çox lazımdır və bu, çox ciddi məsələdir, odur ki, Maliyyə Nazirliyi bu məsələyə əlavə şərh verməlidir.

Yeni İl şoularının qiymətləri

Oxu.az saytında isə "Yeni İl şou-proqramlarının qiymətləri -siyahı" sərlövhəli məqalə oxumaq olar.

Müəllif, demək olar ki, hamı üçün maraqlı olan 2019-cu il- Yeni İl şənlikləri keçirilən restoranlarda və əyləncə mərkəzlərində ailəvi istirahət üçün qiymətləri diqqətə çatdırır.

Müəllif deyir ki, hər axşam şou-proqramlı olan "Oazis" restoranı Yeni il şou-şənliklərinə dekabrın 23-dən başlayır, bayram günlərində adambaşına qiymət 100-150 manat təşkil edəcək, müğənnilərin ifası gözlənilir.

Müəllifin sözlərinə görə, "Ay İşığı" restoranı Yeni İli qeyd etməyə 25 dekabrdan başlayır, qitmət adambaşına 100-300 manat arasında dəyişir, səhnəyə yaxın, loja və s. əyləşdiyiniz yerə görə qiymətlər fərqlənir.

Saat 21:00-dan səhər 05:00-a kimi olan şou proqramda bir çox məşhurların çıxış edəcəyi deyilir, şou-proqram üçün biletlər satışdadır, beş yaşa qədər uşaqlara biletlər pulsuz, 6-12 yaş arası yarı qiymətədir.

Müəllif deyir ki, "Neolit" restoranında bayram 20 dekabrdan bir adam üçün 40 manat olaraq başlayır, 31 dekabr - bayram günü isə 150 manata yüksəlir.

"Sea Bay" restoranında 31 dekabrda qeyd olunan Yeni İl iki zalda keçirilir, qiymət zallara görə 70-120 manat arası dəyişir.

20 dekabrdan "Lido" restoranında da Yeni İl şou-proqramları start götürür, 31 dekabrda 120 manatdan başlayaraq dəyərə minir.

28 dekabr və 31 dekabr günü "Mala Praqa" restoranında da Yeni İl qeyd olunacaq, qiymətlər bir adam üçün 130 manatdır.

Müəllifin sözlərinə görə, "Nar & Şərab" restoranı da Yeni İlə hazırlaşır, dekabrn 31-də zallara görə qiymətlər 120-150 manat arasında dəyişir.

Müəllifin sözlərinə görə, menyularda elə bir fərq yoxdur, dəyişən qiymətlər, bir də musiqiçilərin sayının az-çox olmasıdır.