Media-icmal 09.11.20

"Azərbaycan" qəzeti  "Azərbaycan yaxın vaxtlarda Dağlıq Qarabağın bütün ərazisində öz suverenliyini tam bərpa edəcək" sərlövhəli məqalədə Qarabağ cəbhəsindəki vəziyyəti dəyərləndirir.

Rusiyanın ictimai xadimi, politoloq, Siyasi Araşdırmalar İnstitutunun baş direktoru Sergey Markov bildirir ki, Azərbaycan dövlət başçısı İlham Əliyev noyabrın 8-də Şuşanın işğaldan azad edildiyini bildirib.

"Bu, müharibənin əsas məqamıdır. Demək olar ki, ikinci Qarabağ müharibəsi Azərbaycanın tam qələbəsi ilə başa çatdı", deyə S.Markov bu qələbənin mahiyyətini dəyərləndirir.

Politoloq deyir ki, indi şimal yolu Xankəndidən olan qaçqınlarla doludur, amma Azərbaycan Ordusu qaçqınlara heç bir təcavüz göstərmir.

S.Markov vurğulayır ki, indi Ermənistanın müharibəni dayandırmaq şansı var və əgər Paşinyan Ermənistanın bütün ordusunun, - bu ordu yaxın vaxtlarda Dağlıq Qarabağda mühasirəyə alınacaq, - Dağlıq Qarabağdan çıxarılması barədə əmr verərsə, o halda hərbi əməliyyatlar dayanar və sülh danışıqları başlanar.

Onun fikrincə, əks halda bu, mühasirəyə düşmüş erməni qoşunlarının sonadək qırılmasına gətirib çıxara bilər.

S.Markov deyir ki, Dağlıq Qarabağda müharibə hər halda tezliklə başa çatacaq. "Hamıya aydındır ki, Azərbaycan yaxın vaxtlarda Dağlıq Qarabağın bütün ərazisində öz suverenliyini tam bərpa edəcək… Azərbaycan tam qələbənin bir addımlığındadır", deyə o bildirir.

"Müsavat.com" saytında "Tibb elmləri doktorundan çağırış: Qaydalara əməl olunmazsa, karantin daha da sərtləşdirilə bilər" sərlövhəli məqalədə son günlər koronavirusa yoluxmada ciddi artım olması və bunun perspektivi barədə danışılır.

Müəllif deyir ki, virus artmaqda davam edir, buna görə də ölkə ərazisində sanitar-epidemioloji vəziyyəti nəzərə alaraq Operativ Qərargah 10-a qədər rayon və şəhərdə xüsusi karantin rejimi qaydaları tətbiq edib.

 Köln Universiteti Klinikasının tibb elmləri doktoru Nuran Abdullayev deyir ki, hazırda bütün dünya ölkələrində olduğu kimi, Azərbaycanda da virusa yoluxanların sayı durmadan artır, sanitar-epidemioloji vəziyyət çətinləşir.

Onun fikrincə, buna görə də infeksiyanın yayılma sürəti yeni qaydaların tətbiq edilməsinə gətirib çıxarır.

"Düşünürəm ki, Nazirlər Kabineti yanında Operativ Qərargahın noyabrın 6-da verdiyi qərarlar məqsədəuyğundur. Hesab edirəm ki, hətta ölkə üzrə sərt karantin rejiminin tətbiq edilməsinə zərurət yaranıb... ən azı 2-3 həftəlik bütün ölkə üzrə sərt karantin rejimi tətbiq etmək lazımdır", deyə N.Abdullayev qeyd edir.

Onun fikrincə, şəhər və rayonlararası, eyni zamanda kəndlərarası gəliş-gediş məhdudlaşdırılmalı, ictimai nəqliyyatın fəaliyyəti dayandırılmalı, kafe və restoranlar, digər iaşə obyektləri bağlanmalıdır.

N.Abdullayev xəbərdarlıq edir ki, əgər bu rejim çərçivəsində Azərbaycanda deyilənlərə əməl olunmazsa, virusa yoluxanlarla yanaşı, ölüm saylarında da kəskin artım olacaq.

O hesab edir ki, buna görə də virusdan qorunmaq üçün yalnız tətbiq edilən qaydalara riayət etmək lazımdır, istər qapalı, istərsə də açıq havada mütləq formada maska taxılmalı, məsafə saxlanılmalıdır.

"Redaktor.az" saytı  "Bayden prezident seçilərsə, neftin qiyməti... ekspert rəyi" sərlövhəli məqalədə son vaxtlar dünya neft bazarında neftin dəyərinin ucuzlaşmasının səbəbləri barədə iqtisadçı-ekspert Natiq Cəfərli ilə söhbətləşir.

N.Cəfərliyə görə, hazırda dünya birjalarında neftin qiymətinin düşməsinin bir neçə səbəbi var və bu səbəblərdən biri də pandemiyanın yenidən baş qaldırmasıdır.

Ekspert iddia edir ki, ABŞ Prezidentliyinə namizəd Co Bayden prezident seçildiyi təqdirdə uzun müddət neft qiymətlərinin aşağı olacağını iddia edib: "ABŞ-da Co Baydenin prezident seçilməsi neftin qiymətinə ciddi təsir edəcək. Çünki belə bir ehtimal var ki, Bayden prezident seçilərsə, o, yanvar ayından İranla münasibətləri düzəltməyə çalışacaq".

Ekspertə görə, bu, İranla danışıqlarda yeni mərhələnin açılması və sanksiyaların aradan qaldırılması ola bilər, bu da İran neftinin yenidən dünya bazarlarına çıxma ehtimalını yüksəldir. Onun fikrincə, bazarda neft nə qədər çox olsa qiymətlər də bir o qədər aşağı olur,

Onun sözlərinə görə, həmçinin, Baydenin siyasəti "yaşıl iqtisadiyyat" üzərində qurulub. "Yəni bərpa olunan enerji, yaşıl iqtisadiyyata təşviq paketləri və s., bütün bunlar da neftin qiymətinə təsir edəcək. Bir sözlə, əgər Co Bayden ABŞ prezidenti seçilərsə, neftin qiyməti uzun müddət aşağı səviyyədə qalacaq", deyə eskpert bildirib.