Media-icmal 12.07.17

Birinci vitse-prezident Mehriban Əliyevanın məcburi köçkünlərin yaşayış şəraitinin yaxşılaşdırılması ilə bağlı çağırışına dəstəyin artması, istehlak bazarındakı bahalıq, bəzi ərzaq mallarının ucuzlaşmasının səbəbləri, "Şıxov" ərazisindəki çimərliklərdə qiymətlər bugünkü (12iyul, 2017-ci il) mediadan seçmələrdir.

Birinci vitse-prezidentin çağırışına dəstək güclənir

"Azərbaycan " qəzeti "Mehriban Əliyevanın təşəbbüsü böyük xeyriyyə hərəkatına çevrilir (http://www.azerbaijan-news.az/index.php?mod=3&id=126001) sərlövhəli məqalə ilə çıxış edir.

Müəllif deyir ki, Azərbaycan Respublikasının birinci vitse-prezidenti Mehriban xanım Əliyevanın məcburi köçkünlərin yaşayış şəraitinin yaxşılaşdırılması ilə bağlı çağırışına dəstək olmaq səyləri artır: "Bu günlərdə bu təşəbbüsə öz töhfəsini vermək məqsədilə Bakının Səbayel rayonunun tikinti sahəsində fəaliyyət göstərən firma, şirkət, Mənzil Tikinti Kooperativi, ümumilikdə 20-dən çox şirkət rəhbərinin iştirakı ilə toplantı keçirilmişdir".

Sahibkarlar məcburi köçkünlərin həyat şəraitinin yaxşılaşdırılmasında lazımi kömək göstərməyə hazır olduqlarını diqqətə çatdırıblar və birinci vitse-prezident Mehriban xanım Əliyevanın təşəbbüsünə qoşulduqlarını bildiriblər.

Müəllif deyir ki, natiqlər M.Əliyevanın Qaradağ rayonunda məcburi köçkünlər üçün yaşayış kompleksinin təməlqoyma mərasimində çıxışı zamanı sahibkarların ünvanına dediyi xoş sözlərə görə təşəkkür ediblər və məcburi köçkünlərin yaşayış şəraitinin yaxşılaşdırılması istiqamətində dəstəklərini əsirgəməyəcəklərini vəd ediblər.

Məqalədə deyilir ki, tədbirdə Səbayel rayonu ərazisində mənzil tikintisi ilə bağlı hazırda 10-dan çox pilot layihəsi həyata keçirilir, 8 ünvanda tikinti aparılır, digər layihələrlə bağlı isə sənədləşmə işləri gedir. Bu layihələrdə iştirak etmək üçün yeni-yeni sahibkarların müraciətləri səslənir.

Yazı müəllifi deyir ki, sahibkarlar həyata keçiriləcək layihələrdə iştirakçı olmaqdan məmnunluq bildiriblər və bu təşəbbüsə qoşulmalarının ifadəsi olan bəyanat qəbul ediblər.

Azalan gəlirlər, enməyən qiymətlər

"Exo" qəzeti "Azərbaycan əhalisinin alıcılıq qabiliyyəti 18% azalıb" sərlövhəli (http://ru.echo.az/?p=60808) məqalədə problemi ekspert Nəriman Ağayevlə araşdırır.

"Bu gün Azərbaycan istehlak bazarında təklif tələbi üstələyir, amma alıcılıq qabiliyyətinin 18% azalmasına baxmayaraq, ərzaq mallarının qiyməti aşağı salınmır və bu meyl ilin sonuna kimi davam edəcək. Şübhəsiz ki, əhalinin gəlirlərinin azalmasına ölkə iqtisadiyyatındakı durum təsir göstərir, çoxları iş yerlərini itiriblər, əhalinin digər hissəsinin əmək haqları azaldılıb". Bu durumu qəzetə ekspert N.Ağayev şərh edir.

N.Ağayev xatırladır ki, bundan başqa ilin əvvəlində ərzaq malları 25-30% olmaqla əhəmiyyətli dərəcədə bahalaşıb və bütün bu amillər əhalinin alıcılıq qabiliyyətinin güclü şəkildə azalmasına səbəb olub.

Ekspert deyir ki, əvvəllər ölkə vətəndaşları "arxa gün"ə vəsait toplaya bilirdilər, amma indi durum dəyişib, qazandıqları vəsatiləri bu aydan o aya güclə çatdırırlar: "Gəlirlər o qədər azalıb ki, artıq "arxa gün"ə qoymağa bir şey yoxdur, ölkə iqtisadiyyatı durğunluqdan çıxa bilmir, əmək haqqının əksər hissəsi ərzaq mallarının alınmasına gedir, ikinci yeri isə sağlamlığa aid xərclər tutur, bu gün xəstələnmək çox ağır baha başa gəlir".

Müəllif eskpert təhlili fonunda ayrı-ayrı istiqamətlər üzrə statistik göstəriciləri xatırladır, bu göstəricilərə şübhə edir və deyir ki, keçən il yoxsulluq cəmi 1% artıb, yəni, 4,9%-dən 5,9%-ə yüksəlib.

Müəllif vurğulayır ki, bu göstəricilərə görə, bu ilin yanvar-may aylarında əhalinin nominal gəlirləri 18 milyard manat olub ki, bu da keçən ilin analoji dövrülə müqayisədə 7%-dən çoxdur, adambaşına düşən nominal gəlir isə 6,2% artaraq 1 min 917,5 manat təşkil edir.

Məqalədə bu ilin yanvar-may aylarında ölkə əhalisinin 13 milyard manatlıq istehlak malları aldığı deyilir ki, bu da 2016-cı il ilə müqayisədə 2% artım deməkdir və bu məbləğin 6,5 milyard manatı ərzaq, 6,4 milyard manatı isə qeyri-ərzaq mallarının alınmasına xərclənib.

Yazı müəllifi bildirir ki, bu ilin yanvar-aperl aylarında ərzaq mallarının adambaşına alınmasına görə xərclər 134,5 manat, qeyri-ərzaq mallarının alınmasına görə isə 131,7 manat olub.

Ekspert: qiymət enməsi mövsümidir

"Yeni Müsavat" qəzeti "Bəzi ərzaq malları ucuzlaşıb- səbəb" sərlövhəli (http://musavat.com/news/bezi-erzaq-mehsullari-ucuzlasib-sebeb_452906.html) məqalədə bəzi malların ucuzlaşması səbəbinə ekspert Vüqar Bayramovla aydınlıq gətirir.

Müəllif deyir ki, son zamanlar bəzi ərzaq məhsullarının ucuzlaşması müşahidə edilir və bunların arasında yerli mövsüm məhsulları ilə yanaşı, xaricdən idxal olunan kənd təsərrüfatı və sənaye məhsulları da var. Azərbaycan ərzaq bazarı üçün bir indikator olan bananın qiyməti son bir həftədə 2.70 manatdan, 1.90-2.2 manata düşüb:"Bunun iki mühüm səbəbi var. Birinci səbəb mövsümi olaraq xaricdə bu məhsulların qiymətlərində olan ucuzlaşmadır. Təbii ki, nəticə etibarilə onların həm dollar, həm də digər valyutalarla xərcinin azalmasına gətirib çıxarır. Sözsüz ki, dünya bazarında bütövlükdə belə məhsulların qiymətlərinin aşağı düşməsi Azərbaycana idxal edilən ərzaq məhsullarının qiymətinə də təsir göstərir". Ekspert V.Bayramov durumu belə anladır.

V.Byaramov qiymət enməsinə daha bir səbəb kimi fevral ayından manatın məzənnə sabitliyini göstərir ki, məzənnə 5 aydan yuxarı sabit qaldığı üçün bəzi idxalçı şirkətlərin qiymətlərinə yenidən baxa biliblər.

Ekspert deyir ki, ucuzlaşma ən çox saxlama müddəti olmayan məhsullar üzrə baş verib, bu da zamanında 1, 91 kursu ilə alınan mallardır ki, indi manat ifadəsində azalmış qiymət kimi görünür.

Bu prosesin nə qədər uzunmüddətli olacağına gəlincə, V.Bayramov bildirir ki, dünya bazarında məhsulların ucuzlaşması mövsümi xarakter daşıyır və xüsusən də o ərzaq məhsulları üzrə ki onları uzun müddət saxlamaq mümkün deyil.

"Onların istehsalı artıb və nəticədə şirkətlər dünya bazarında qiymətləri endirirlər ki, məhsulları qısa zamanda daha çox sata bilsinlər, çünki istehsal çoxdur, saxlama müddəti az. Bu baxımdan bəzi məhsullar üzrə qiymət azalmaları mövsümi xarakter daşıyır".

Ekspert deyir ki, digər bir əsas faktor manatın məzənnəsinin sabitliyi olacaq, manatın məzənnəsindəki sabitiyin hansı müddəti əhatə etməsi mühüm rola malikdir.

V.Bayramov deyir ki, manat növbəti dövrlərdə sabitliyini saxlarsa, bu zaman bazarda qiymətlərin tənzimlənməsi və sabitləşməsi mümkündür, manatın məzənnəsində yenidən dəyişikliklər olarsa bu bazardakı qiymətlərə də təsir göstərəcək.

Çimərliklərdə "əl yandıran" qiymətlər

"Bizim yol" qəzeti "Şıxov"da çimərliklərə giriş neçəyədir?" sərlövhəli məqalədə (http://www.bizimyol.info/az/news/8016.html) mövsümlə bağlı çimərliklərdə xidmət qiymətlərini dəyərləndirir.

Bu mənada müəllif şəhərə daha yaxın "Şıxov" ərazisindəki çimərliklərdə durumla maraqlanır və deyir ki, bu ərazidə iki baxımsız sahədən başqa bütün yerlər ödənişlidir.

Müəllif çimərliklərin adlarını sadalayaraq bildirir ki, çiməriklərə girişlərin qiymətləri adambaşına 3-30 manat arasında dövr edir, masa, hovuz xidmətlərinə görə əlavə daha 5-10 manat arasında ödənişlər olunmalıdır.

Yazı müəllifi xatırladır ki, masadan istifadə üçün nə isə sifariş verilməlidir və burada mürəbbəli cay 6 manatdır.

Müəllif vurğulayır ki, adları sadalanan çimərlik mərkəzlərində kababların 1 şişi 6-8 manat, pivələr 3-4 manat, energetik içkilər isə 2-3 manat arasında dəyişir.

Yazıda bildirilir ki, çimərlikdən doymayıb istirahət mərkəzlərinin mehmanxanalarında qalmaq istəyənlər bir gecə üçün 130 manat ödəməlidir,

"Ramada Hotel"də dəniz mənzərəli nömrələrdə qonaq qalmaq isə 200-250 manata başa gəlir. Bu qiymətə ancaq səhər yeməyi, hovuzlardan, fitness zaldan və çimərlikdən istifadə daxildir.

Bu arada, istirahətə gələrkən çimərlik geyimlərini unudanlar və ya təsadüfən çimərliyə gələnlər də nəzərə alınırlar, bəzi istirahət mərkəzlərinin yaxınlığında həm qadınlar, həm də kişilər üçün çimərlik geyimləri satılır.

Belə ki, kişi şortlarının qiyməti 5-10 manat arasında dəyişir, qadın geyimlərinin qiyməti isə 15-25 manatdır. Uşaqlar üçün xilasedici hava şarları 3 manat, böyüklər üçün isə 5 manat, topların qiyməti isə 1 manatdır.