Media-İcmal 13.02.2016

Ölkənin yaşadığı çoxtərəfli problemlər medianın aparıcı mövzusudur.

Amma rəsmi qəzetlər fərqli düşünürlər. “Azərbaycan” qəzeti “Antidempinq, kompensasiya və mühafizə tədbirləri haqqında” qanunun qəbul olunması ilə ölkənin iş adamlarının problermlərinin bitəcəyi düçüncəsini cəmiyyətə  təqdim edir. “Bu qanun zərərvurma təhlükəsi yaradan dempinqi və yaxud subsidiyalaşdırılan idxala, həmçinin yerli istehsal sahəsinə ciddi zərər vuran və ya zərərvurma təhlükəsi yaradan idxala qarşı həyata keçirilən tədbirləri antidempinq, kompensasiya və xüsusi rüsumların formalaşdırılması və tətbiqi qaydalarını tənzimləyir”, deyə deputat Ziyad Səmədzadə ilk oxunuşda qəbul edilən qanun barədə mövqeyini bildirib.

“Hakimiyyətə qarşı sanksiyalar yenə gündəmdədir”, deyə yazan “Azadlıq” (http://www.azadliq.info/119534.html) qəzeti ABŞ Konqresində müzakirəsi gözlənilən “Azərbaycanda Demokratiya Aktı” qanun layihəsilə bağlı dinləmə keçirildyini xatırladır.

““Azərbaycanda Demokratiya Aktı”nın ermənilərlə heç bir əlaqəsi yoxdur, sənəddə Azərbaycanda insan haqlarından danışlır. Xədicə İsamylova kimi jurnalsitlər də daxil olmaqla, bir çox insanlar həbs ediləndə biz “Azərbaycanda Demokratiya Aktı” kimi sənədlər qəbul edirik”, - deyə layihə müəllifi, konqresmen Kristofer Smit bildirib və “Azərbaycan parlamenti və Əliyev hökumətinin buna reaksiyası düşüncəsilziyin təzahürüdür ki, sənədi ermənilərin mənə sifariş etdiklərini bildirirlər”, - deyə mövqeyini ictimaiyyətə çatdırır. Həm də bu sənədlə bağlı məsələdə rəsmi Bakının “erməni izi” axtarmasının əsassız olduğunu önə çəkir.

“Əgər siz müstəqil KİV-ləri məhv edirsinizsə, plüralizm yoxdursa cəmiyyətə dezinformasiya verilə bilər. Azərbaycan kimi ölkələr başa düşməlidir ki, insan hüquqları, demokratiya, azad seçkilər yoxdursa uzun müddət təhlükəsiz ola bilməzlər”, - deyə ATƏT/DİTHB rəhbəri Georq Link konqresmeninin mövqeyini müdafiə edib.

“Bakı Qərblə Şərq arasında vurnuxur” yazan “Novoe Vremya” (http://www.novoye-vremya.com/w55732/.../#.Vr7Gh08R9Hk) qəzeti ölkə rəhbərliyinin konkret siyasi kursu olmadığını nəzərə çatdırır.

Qəzet son zamanlara kimi rəsmi Bakının az qala hər gün Qərbə dirsək göstərdiyini xatırladır, indi isə bunun əksi olan Qərblə strateji tərəfdaşlıqdan danışdığını vurğulayır. Son günlər Böyük Britaniyada keçirilən tədbirlər buna nümunə olaraq göstərilir. Qəzet bu faktı Qərbin yenidən Bakı üçün “ətli-canlı” və yaxşı olması kimi dəyərləndirir. “Azərbaycanın uzun illər yürütdüyü “balanslı siyasət səmərə vermir və lazımsız olub. Müəyyən müddət bu siyasət ABŞ və Rusiyanı qane edirdi, amma son zamanlar baş verən hadisələr Qərblə Rusiya arasındakı ziddiyyətlərin dərinləşdiyini göstərir. İndiki mürəkkəb sitausiyada Bakının “balanslı siyasət” yürütməsi çətin olacaq. Zaman israrla prioritetləri dəqiq müəyyənləşdirməyi tələb edir", - deyə qəzet mövcud siyasi şəraitin ölkə önünə hansı tələbləri qoyduğunu vurğulayır.

“Bizim yol” (http://www.bizimyol.info/news/72690.html) qəzeti qeyri-neft sahələrindən biri kimi turizmin inkişafına olan əngəlləri ekspertlərlə şərh edir. Belə ki, Azərbaycan ən çətin viza alınan 10 ölkə siyahısındadır. Bu sahədə qanunvericilikdə, eləcə də elektron sənədləşmənin tətbiqi sahəsində problemlərin aradan qaldırılması kimi təkliflər səslənir. “Bu istiqamətdə ən düzgün yanaşma Azərbaycan üçün vacib olan, sərmayə qoyuluşunda öndə gələn seçilmiş ölkələr üçün viza tətillərinin elan edilməsidir”, deyə iqtiqsadçı Qubad İbadoğlu çıxış yolu göstərir. Daha sonra Q.İbadoğlu bu üsuldan son zamanalar Qazaxıstanın bəhrələnmək istədiyini yada salır.

Q.İbadoğluna görə, ölkəyə xarici sərmayə və kütləvi turust cəlb edilməsində həlli vacib olan məsələlərdən biri də viza rejiminin liberallaşdırılmasıdır. Turizm və Menecment universitetinin kafedra müdiri Bahadur Bilalov da Avropa, ABŞ və Yaponiya vətəndaşları üçün viza rejiminin sadələşdirilməsini vacib sayır, hava limanına daxil olduqda orada viza ala bilmələrinə şərait yaradılmasının vacibliyinə toxunur.

“NATO gəmilərinin gəlişini bu mənada gücə qarşı operativ güc nümayişi də saymaq mümkündür”, deyə “Yeni Müsavat” qəzeti (http://musavat.com/news/dunya/nato-gemileri-ilk-defe-batumi-limaninda-azerbaycanin-qerb-qapisi-nezarete-goturulur_325692.html) NATO Alyansı gəmilərinin Batuma ilk gəlişini dəyərləndirir.

Qəzet görə, Alyans yeni siyasət çərçivəsində artıq hərəkətə keçib. Son zamanlar Rusiyanın region və onun ətrafında hərbi cəhətdən fəallaşması, təlimlərə başlamasının buna səbəb olduğu vurğulanır. “Bu isə Qərbin bölgədəki maraqlarına, Gürcüstanla Azərbaycanın təhlükəsizliyinə eyni zamanda Gürcüstandan keçməklə Qərbə uzanan strateji əhəmiyyətli kəmərlər və nəqliyyat dəhlizlərinə, o cümlədən yekunlaşmaqda olan Bakı-Tiflis-Qars dəmiryoluna, TANAP-a açıq təhdid, güc nümayişidir. Gürcüstan Azərbaycan üçün yeganə “Qərb qapısı” olduğundan olayı Azərbaycana da xoşməramlı bir mesaj saymaq olar”, - deyə qəzet Aylansın missiyasına aydınlıq gətirir.  Qəzet bu səfəri həm də Alyansın bölgənin strateji əhəmiyyətli kəmər və dəhlizlərini də zəmanət altına alacağı ilə bağlı Rusiyaya açıq mesaj verməsi kimi nəzərə çatdırır.