Londonda Azərbaycan-Britaniya siyasi məsləhətləşmələri

Dünən Londonda iki ölkənin xarici işlər nazirlikləri arasında keçirilən siyasi məsləhətləşmələrdə Azərbaycan-Britaniya münasibətləri ilə bağlı geniş məsələlər spektri müzakirə olunub.

Tərəflərin nümayəndə heyətlərinə xarici işlər nazirinin müavini Xələf Xələfov və Böyük Britaniyanın Avropa məsələləri üzrə dövlət naziri Devid Lidinqton sədrlik edib.

Görüşdə qeyd edilib ki, Azərbaycan və Böyük Britaniya arasında siyasi dialoq yüksək səviyyədədir. Azərbaycan-Böyük Britanya Birgə Hökumətlərarası Komissiyasının 11 fevral tarixində London şəhərində keçirilmiş ilk iclasının ölkələrimiz arasında qeyri-enerji sahələri başda olmaqla iqtisadi əməkdaşlığın genişləndirilməsinə töhfə verəcəyinə əminlik ifadə olunub.

Həmçinin, Qarabağ mövzusuna toxunulub. Xələfov Böyük Britaniyanın Azərbaycanın ərazi bütövlüyü və suverenliyi ilə bağlı mövqeyini yüksək qiymətləndirib. O, Böyük Britaniya tərəfindən Azərbaycanın işğal olunmuş ərazilərinə qanunsuz səfərlərin qarşısının alınmasına yönəlmiş addımlar atılması zərurətini vurğulayıb.

Dövlət naziri Devid Lidinqton öz növbəsində ölkəsinin Azərbaycanla əməkdaşlığa xüsusi əhəmiyyət verdiyini qeyd edib və dinamik inkişaf edən ikitərəfli əməkdaşlığın daha da genişləndirilməsi baxımından geniş potensialın olduğunu nəzərə çatdırıb. Lidinqton həmçinin əlavə edib ki, Böyük Britaniya separatçı rejimi tanımır və onunla rəsmi səviyyədə heç bir münasibəti yoxdur. Lidinqton inandırıb ki, ölkəsi bundan sonra da Azərbaycanın ərazi bütövlüyünü qətiyyətlə dəstəkləyəcək. -06D-